《勸世歌：船過水無痕》Tsûn Kuè Tsuí Bô Hûn 葉秋雲 Ia̍p Tshiu-hûn (葉青Ia̍p Tshing) ------------------------------------------------------ 朋友兄弟我總請 pîng-iú hiann-tī guá tsóng tshiánn 唸歌勸世分恁聽 liām kua khuàn-sè pun lín thiann 艱苦富貴自運命 kan-khóo hù-kuì tsū ūn-miā 虎死留皮人留名 hóo sí lâu phuê lâng lâu miâ 早前我是浪蕩漢 tsá-tsiân guá sī lōng-tōng-hàn 受過監獄十年的苦難 siū kuè kann-ga̍k tsa̍p nî ê khóo-lān 這款歌仔是真希罕 tsit khuán kua-á sī tsin hi-hán 專講勸人在世間 tsuan kóng khǹg lâng tsāi sè-kan 勸恁逐家著做好 khǹg lín ta̍k-ke tio̍h tsuè hó 世間暫時來𨑨迌 sè-kan tsiām-sî lâi thit-thô 人講做惡有惡報 lâng kóng tsuè-ok ū ok-pò 天理昭昭毋是無 thinn-lí tsiau-tsiau m̄-sī bô 咱來出世無半項 lán lâi tshut-sì bô-puànn-hāng 轉去雙手又空空 tńg--khì siang-tshiú iū khang-khang 想真做人若眠夢 siūnn tsin tsuè-lâng ná bîn-bāng 虧心毒行仙著毋通 khui-sim to̍k-hīng sian tio̍h m̄-thang 做人第一著善良 tsuè-lâng tē-it tio̍h siān-liông 為非糝做天毋從 uī-hui sám-tsuè thian m̄ tsiông 失德錢財無路用 sit-tik tsînn-tsâi bô-lōo-iōng 總有一日受災凶 tsóng ū-tsi̍t-ji̍t siū tsai-hiong 再勸後輩的少年 tsài khǹg hiō-puè ê siàu-liân 世情是我看上現 sè-tsîng sī guá khuànn siōng hiān 看人有錢免欣羨 khuànn lâng ū-tsînn bián him-siān 人講運命莫怨天 lâng kóng ūn-miā bo̍k uàn thian 命中八字有輕重 miā tiong peh-jī ū khin-tāng 翻天斡角無彩工 huan-thinn uat-kak bô-tshái-kang 不義的錢財毋通望 put-gī ê tsînn-tsâi m̄-thang bāng 想貪你就會軁雞籠 siūnn tham lí tiō ē nǹg ke-lam 想到當今的世界 siūnn kàu tong-kim ê sè-kài 鳥為食亡人為財 niáu uī si̍t bông lâng uī tsâi 論真做人著海海 lūn-tsin tsuè-lâng tio̍h hái-hái 死終何去生何來 sí tsiong hô khì sinn hô lâi ---------------- 做著歹田望後冬 tsuè tio̍h pháinn-tshân bāng āu-tang 娶著歹某規世人 tshuā-tio̍h pháinn-bóo kui-sì-lâng 女性最驚採花蜂 lú-sìng tsuè kiann tshái-hue-phang 男性最驚臭花欉 lâm-sìng tsuè kiann tshàu-hue-tsâng 做人著愛勤儉才有底 tsuè-lâng tio̍h-ài khûn-khiām tsiah ū-té 做牛嘛著愛拖犁 tsuè gû mā tio̍h-ài thua-lê 每日想欲花天佮酒地 muí-ji̍t siūnn-bueh hua-thian kah tsiú-tē 歸尾某囝變成別人的 kui-bué bóo-kiánn piàn-sîng pa̍t-lâng--ê 酒不醉人人自醉 tsiú put tsuì jîn jîn tsū tsuì 有的啉甲變烏龜 ū-ê lim kah piàn oo-kui 出門予人叫酒鬼 tshut-mn̂g hōo-lâng kiò tsiú-kuí 怹某的契兄規大堆 in bóo ê khè-hiann kui tuā tui 花不迷人人自迷 hua put bê jîn jîn tsū bê 每暗花頭揣野雞 muí-àm hua-thâu tshuē iá-ke 彼號的出世欲來開家伙 hit-lō ê tshut-sì bueh lâi khai ke-hué 入門翁某就冤家 ji̍p-mn̂g ang-bóo tiō uan-ke 一種暗時仔毋睏睏日晝 tsi̍t-tsióng àm-sî-á m̄ khùn khùn ji̍t-tàu 規暝翁某亂操操 kui-mê ang-bóo luān-tshau-tshau 全是半暝仔兩點後 tsuân sī puànn-mê-á nn̄g tiám āu 毋是播田就是巡田溝 m̄-sī pòo-tshân tiō-sī sûn-tshân-kau 嫁翁望欲相致蔭 kè-ang bāng bueh sio tì-ìm 翁某算來仝條心 ang-bóo sǹg lâi kāng tiâu sim 一家和平萬事忍 tsi̍t-ke hô-pîng bān-sū jím 烏塗就會變成金 oo-thôo tiō ē piàn-sîng kim 人種算來百百項 lâng-tsióng sǹg lâi pah-pah hāng 怹某媠甲一蕊若花欉 in bóo suí kah tsi̍t luí ná hue-tsâng 彼號的媠某甘願放 hit-lō ê suí bóo kam-guān pàng 外頭包飼一隻虎頭蜂 guā-thâu pau-tshī tsi̍t tsiah hóo-thâu-phang 有的財產開了了 ū-ê tsâi-sán khai liáu-liáu 出門西裝穿牢牢 tshut-mn̂g se-tsong tshīng tiâu-tiâu 毋是查某就是筊 m̄-sī tsa-bóo tiō-sī kiáu 毋管某囝咧叫枵 m̄-kuán bóo-kiánn teh kiò iau 有的生理無顧做 ū-ê sing-lí bô-kòo tsuè(tsò) 食飽筊間賴賴趖 tsia̍h-pá kiáu-king luā-luā sô 毋管頭路會好抑會倒 m̄-kuán thâu-lōo ē hó ia̍h ē tó 甘願筊間做阿哥 kam-guān kiáu-king tsuè a ko 韓信設筊害死人 Hân-sìn siat-kiáu hāi-sí lâng 有的輸甲走無空 ū-ê su kah tsáu bô-khang 厝內當甲無半項 tshù-lāi tǹg kah bô-puànn-hāng 非領詐欺入鐵窗 hui-líng tsà-khi ji̍p thih-thang 跋筊的人無志氣 pua̍h-kiáu ê lâng bô tsì-khì 指頭仔鏨起來也是閣再奕 tsíng-thâu-á tsām--khí-lâi iā-sī koh-tsài ī 輸甲無柴佮無米 su kah bô tshâ kah bô bí 五路無當通借錢 ngóo-lōo bô-tàng thang tsioh-tsînn 查某會跋筊上悽慘 tsa-bóo ē pua̍h-kiáu siōng tshi-tshám 一身輸甲無半項 tsi̍t-sin su kah bô-puànn-hāng 筊輸規暝毋願放 kiáu su kui-mê m̄-guān pàng 轉去順紲揣無翁 tńg-khì sūn-suà tshuē-bô ang 跋筊查某上連回 pua̍h-kiáu tsa-bóo siōng liân-huê 一間放甲毋成家 tsi̍t king pàng kah m̄-tsiânn ke 筊輸袂過還筊債 kiáu su bē-kuè hîng kiáu-tsè 掩掩揜揜欲偷咬雞 ng-ng-iap-iap bueh thau-kā-ke 做人若有照起工 tsuè-lâng nā ū tsiàu-khí-kang 將來一定有所望 tsiong-lâi it-tīng ū sóo bāng 有的食飽毋振動 ū-ê tsia̍h-pá m̄ tín-tāng 早起時仔睏甲日頭紅 tsá-khí-sî-á khùn kah ji̍t-thâu âng 勸人毋通歹心行 khǹg lâng m̄-thang pháinn sim-hīng 舉頭三尺有神明 kí thiô sann tshioh ū sîn-bîng 善惡到頭有報應 siān-ok tò-thiô ū pò-ìng 天地註定明明明 thinn-tē tsù-tiānn bîng-bîng bîng 社會算來千萬種 siā-huē sǹg lâi tshian-bān tsióng 奸奸鬼鬼天毋從 kan-kan kuí-kuí thian m̄ tsiông 毋是有錢就高尚 m̄-sī ū-tsînn tiō ko-sióng 對待國家愛盡忠 tuì-thāi kok-ka ài tsīn-tiong 三國時代關雲長 Sam-kok sî-tāi Kuan Hûn-tióng 論伊做人最盡忠 lūn i tsuè-lâng tsuè tsīn-tiong 𤆬嫂過關斬六將 tshuā só kuè-kuan tsám lio̍k tsiòng 萬古流傳人表揚 bān kóo liû-thuân lâng piáu-iông ---------------- 做人若有照起工 tsuè-lâng nā ū tsiàu-khí-kang 忠孝兩字毋通放 tiong-hàu nn̄g jī m̄-thang pàng 爸母恩情是真重 pē-bú un-tsîng sī tsin tāng 伊來生咱咱生人 i lâi sinn lán lán sinn lâng 奉敬爸母著孝道 hōng-kìng pē-bú tio̍h hàu-tō 不孝兩字罪難逃 put-hàu nn̄g jī tsuē lân tô 若是少年有做錯 nā-sī siàu-liân ū tsò-tshò 改惡從善事就無 kái ok tsiông siān sū tiō bô 厝邊頭尾著和氣 tshù-pinn-thâu-bué tio̍h hô-khì 圓人會扁扁會圓 înn lâng ē pínn pínn ē înn 有時身體若染病 ū-sî sin-thé nā jiám-pīnn 才免跔人跤腿邊 tsiah bián ku lâng kha-thuí pinn 有的欠人滿滿是 ū-ê khiàm lâng muá-muá-sī 外頭閣想欲娶細姨 guā-thâu koh siūnn-bueh tshuā suè-î 厝內放甲無柴米 tshù-lāi pàng kah bô tshâ-bí 對待某囝絕情義 tuì-thāi bóo-kiánn tsua̍t tsîng-gī 有的事業做真大 ū-ê sū-gia̍p tsuè tsin tuā 外面細姨規大拖 guā-bīn sè-î kui tuā-thua 大某猶是閣毋看破 tuā-bóo iáu-sī koh m̄ khuànn-phuà 無恨少年綴伊咧拖磨 bô hūn siàu-liân tuè i teh thua-buâ 娶著歹某也是苦 tshuā-tio̍h pháinn-bóo iā-sī khóo 一日食飽做某奴 tsi̍t-ji̍t tsia̍h-pá tsuè bóo-lôo 翁婿面子全無顧 ang-sài bīn-tsú tsuân bô-kòo 莫怪怹翁做糊塗 bo̍k-kuài in ang tsuè hôo-tôo 拋妻離子是真濟 phau-tshe lī-tsú sī tsin tsuē 歸尾一定䠡鹿皮 kui-bué it-tīng tshê-lo̍k-phuê 仁義和平才有底 jîn-gī hô-pîng tsiah ū-té 才免萬代人咧罵 tsiah bián bān-tāi lâng teh mē 古早有徛清節牌 kóo-tsá ū khiā tshing-tsiat-pâi 雪梅教子通人知 Suat-muî kàu tsú thong-lâng tsai 詹典夫人真偉大 Tsiam Tián hu-jîn tsin uí-tāi 大義滅親為翁婿 tāi-gī bia̍t-tshin uī ang-sài 這是早前好模範 tse sī tsá-tsîng hó bôo-huān 萬古流傳在世間 bān-kóo liû-thuân tsāi sè-kan 不義錢財毋通趁 put-gī tsînn-tsâi m̄-thang thàn 忠孝節義頭一層 tiong-hàu-tsiat-gī thâu tsi̍t tsân 做人著愛惜本 tsuè-lâng tio̍h-ài sioh pún-hūn 人講有恩著報恩 lâng kóng ū un tio̍h pò-un 對待爸母著孝順 tuì-thāi pē-bú tio̍h hàu-sūn 毋通船過水無痕 m̄-thang tsûn kuè tsuí bô hûn ------------------------------------------ →
朋友兄弟我總請 唸歌勸世分恁聽 艱苦富貴自運命 虎死留皮人留名 早前我是浪蕩漢 受過監獄十年的苦難 這款歌仔是真希罕 專講勸人在世間 勸恁逐家著做好 世間暫時來𨑨迌 人講做惡有惡報 天理昭昭毋是無 咱來出世無半項 轉去雙手又空空 想真做人若眠夢 虧心毒行仙著毋通 做人第一著善良 為非糝做天毋從 失德錢財無路用 總有一日受災凶 再勸後輩的少年 世情是我看上現 看人有錢免欣羨 人講運命莫怨天 命中八字有輕重 翻天斡角無彩工 不義的錢財毋通望 想貪你就會軁雞籠 想到當今的世界 鳥為食亡人為財 論真做人著海海 死終何去生何來
pîng-iú hiann-tī guá tsóng tshiánn liām kua khuàn-sè pun lín thiann kan-khóo hù-kuì tsū ūn-miā hóo sí lâu phuê lâng lâu miâ tsá-tsiân guá sī lōng-tōng-hàn siū kuè kann-ga̍k tsa̍p nî ê khóo-lān tsit khuán kua-á sī tsin hi-hán tsuan kóng khǹg lâng tsāi sè-kan khǹg lín ta̍k-ke tio̍h tsuè hó sè-kan tsiām-sî lâi thit-thô lâng kóng tsuè-ok ū ok-pò thinn-lí tsiau-tsiau m̄-sī bô lán lâi tshut-sì bô-puànn-hāng tńg--khì siang-tshiú iū khang-khang siūnn tsin tsuè-lâng ná bîn-bāng khui-sim to̍k-hīng sian tio̍h m̄-thang tsuè-lâng tē-it tio̍h siān-liông uī-hui sám-tsuè thian m̄ tsiông sit-tik tsînn-tsâi bô-lōo-iōng tsóng ū-tsi̍t-ji̍t siū tsai-hiong tsài khǹg hiō-puè ê siàu-liân sè-tsîng sī guá khuànn siōng hiān khuànn lâng ū-tsînn bián him-siān lâng kóng ūn-miā bo̍k uàn thian miā tiong peh-jī ū khin-tāng huan-thinn uat-kak bô-tshái-kang put-gī ê tsînn-tsâi m̄-thang bāng siūnn tham lí tiō ē nǹg ke-lam siūnn kàu tong-kim ê sè-kài niáu uī si̍t bông lâng uī tsâi lūn-tsin tsuè-lâng tio̍h hái-hái sí tsiong hô khì sinn hô lâi