《青春悲喜曲》Tshing-tshun Pi-hí Khik 作詞：陳達儒 Tân Ta̍t-jû 2010年陳達儒先生紀念音樂會合唱 ------------------------------------- 公園路月暗暝 kong-hn̂g lōo gue̍h-àm mî 東爿只有幾粒星 tang-pîng tsí-ū kuí lia̍p tshinn 伴著阮目屎滴 phuānn tio̍h gún ba̍k-sái tih 毋敢出聲獨看天 m̄-kánn tshut-siann to̍k khuànn thinn . 想彼時雙人 siūnn hit-sî siang-lâng 結合好情意 kiat-ha̍p hó tsîng-ì 想今日身軀 siūnn kim-ji̍t sin-khu 毋是普通時 m̄-sī phóo-thong-sî . (口白)-----↓ 吳先生 Ngôo sian-sinn 阮已經無來離開病院的看護婦生活 gún í-king bô lâi lī-khui pēnn-īnn ê khàn-hōo-hū sing-ua̍h 是袂用得啦 sī buē-īng-ê--lah 阮是信賴你的話 gún sī sìn-lāi lí ê uē 信賴先生你的人格 sìn-lāi sian-sinn lí ê jîn-keh 但是這陣的我 tān-sī tsit-tsūn ê guá 已經毋是普通的身軀囉 í-king m̄-sī phóo-thong ê sin-khu--looh (口白)-----↑ . 公園邊杜鵑啼 kong-hn̂g-pinn tōo-kuan thî 更深露水滴白衣 king tshim lōo-tsuí tih pe̍h-i 心憂悶無元氣 sim iu-būn bô guân-khì 煩惱身中的囝兒 huân-ló sin-tiong ê kiánn-jî . 為難是毋敢 uî-lân sī m̄-kánn 對人亂講起 tuì lâng luān-kóng khí 阮運命現在 gún ūn-miā hiān-tsāi 親像在水墘 tshin-tshiūnn tsāi tsuí-kînn . (口白)-----↓ 事到如今 sū kàu jû-kim 上煩惱的就是腹肚內的這个囡仔 siōng huân-ló--ê tsiū-sī pak-tóo-lāi ê tsit-ê gín-á 無偌久就欲來出世 bô-guā-kú tō beh lâi tshut-sì 你若無對爸母表白 lí nā-bô tuì pē-bú piáu-pi̍k 允准你咱的結婚 ún-tsún lí-lán ê kiat-hun 阮也無面通見社會的人 gún iā bô-bīn thang kìnn siā-huē ê lâng 全望先生你毋通袂記得 tsuân bāng sian-sinn m̄-thang buē-kì-tit 咱初戀的勇氣才好啊 lán tshoo-luân ê ióng-khì tsiah hó--ah (口白)-----↑ . 公園內花芳味 kong-hn̂g-lāi hue-phang-bī 花芳可比阮舊年 hue-phang khó-pí gún kū-nî 叮嚀哥愛會記 ting-lîng ko ài ē kì 毋通愛花無愛枝 m̄-thang ài hue bô ài ki . 阮心內為哥 gún sim-lāi uī ko 無變愛到死 bô piàn ài kàu sí 阮一生毋知 gún it-sing m̄-tsai 幸福抑是悲 hīng-hok ia̍h-sī pi ------ 公園路雨毛毛 kong-hn̂g lōo hōo mn̂g-mn̂g 單身行出病院門 tuann-sin kiânn tshut pēnn-īnn mn̂g 幸福夢今無向 hīng-hok bāng tann bô-ǹg 愈想愈恨割心腸 jú siūnn jú hūn kuah sim-tn̂g . 為著伊 uī-tio̍h i 有厝變成毋敢轉 ū tshù piàn-sîng m̄-kánn tńg 可恨伊 khó-hūn i 放阮母囝誰擔當 pàng gún bó-kiánn sia̋ng tam-tng . (口白)-----↓ 薄情郎 po̍k-tsîng-lông 阮是信賴你是一个人格者 gún sī sìn-lài lí sī tsi̍t-ê jîn-keh-tsiá 是一个有責任的人 sī tsi̍t-ê ū-tsik-jīm ê lâng 誰知影你所講的話 sia̋ng tsai-iánn lí sóo kóng ê uē 全是花言巧語 tsuân sī hua-giân khá-gí 一時做你走避 it-sî tsuè lí tsáu-phiah 腹肚內的囡仔 pak-tóo-lāi ê gín-á 強強就欲出世囉 kiōng-kiōng tō beh tshut-sì--looh 已經無法度 í-king bô-huat-tōo 閣再瞞騙社會的耳目 koh-tsài muâ-phiàn siā-huē ê ní-bo̍k 母囝前途 bó-kiánn tsiân-tôo 叫阮怎樣才好 kiò gún tsuánn-iūnn tsiah hó (口白)-----↑ . 公園路春天後 kong-hn̂g lōo tshun-thinn āu 兩爿蟲聲亂操操 lióng-pîng thâng-siann luān-tshau-tshau 薄情郎做伊走 po̍k-tsîng-lông tsuè i tsáu 這款愛人誰敢交 tsit khuán ài-jîn sia̋ng kánn kau . 想幼囝 siūnn iù-kiánn 出世日子已經到 tshut-sì ji̍t-tsí í-king kàu 可恨伊 khó-hūn i 僥心絕情無回頭 hiau-sim tsua̍t-tsîng bô huê-thâu . (口白)-----↓ 想起初戀彼暗 siūnn-khí tshoo-luân hit àm 相親相愛 siòng-tshin siong-ài 行著這條公園路 kiânn-tio̍h tsit tiâu kong-hn̂g lōo 何等快樂甜蜜 hô-tíng khuài-lo̍k tinn-bi̍t 愛情的結合 ài-tsîng ê kiat-ha̍p 期待幼囝來出世 kî-thāi iù-kiánn lâi tshut-sì 會得創造幸福的家庭 ē-tit tshòng-tsō hīng-hok ê ka-tîng 再三再四 tsài-sam tsài-sù 望你毋通袂記 bāng lí m̄-thang buē-kì 意外盡靠盡誤 ì-guā tsīn khò tsīn ngōo 變成一場空夢的青春悲喜曲 piàn-sîng tsi̍t tiûnn khang-bāng ê tshing-tshun pi-hí khik 吳先生 Ngôo sian-sinn 你真真害人不淺啊 lí tsin-tsin hāi-jîn put-tshián--ah (口白)-----↑ . 公園路孤單行 kong-hn̂g lōo koo-tuann kiânn 手提包袱哭出聲 tshiú the̍h pau-ho̍k khàu tshut-siann 求幸福變歹命 kiû hīng-hok piàn pháinn-miā 咬牙切齒叫君名 kā-gê tshiat-khí kiò kun miâ . 無想阮 bô siūnn gún 應該也著想親囝 ìng-kai iā tio̍h siūnn tshin-kiánn 可恨伊 khó-hūn i 害阮墜落烏暗城 hāi gún tuī-lo̍h oo-àm-siânn ------------------------------- →
公園路月暗暝 東爿只有幾粒星 伴著阮目屎滴 毋敢出聲獨看天 想彼時雙人 結合好情意 想今日身軀 毋是普通時 吳先生 阮已經無來離開病院的看護婦生活 是袂用得啦 阮是信賴你的話 信賴先生你的人格 但是這陣的我 已經毋是普通的身軀囉 公園邊杜鵑啼 更深露水滴白衣 心憂悶無元氣 煩惱身中的囝兒 為難是毋敢 對人亂講起 阮運命現在 親像在水墘 事到如今 上煩惱的就是腹肚內的這个囡仔 無偌久就欲來出世 你若無對爸母表白 允准你咱的結婚 阮也無面通見社會的人 全望先生你毋通袂記得 咱初戀的勇氣才好啊 公園內花芳味 花芳可比阮舊年 叮嚀哥愛會記 毋通愛花無愛枝 阮心內為哥 無變愛到死 阮一生毋知 幸福抑是悲 公園路雨毛毛 單身行出病院門 幸福夢今無向 愈想愈恨割心腸 為著伊 有厝變成毋敢轉 可恨伊 放阮母囝誰擔當 薄情郎 阮是信賴你是一个人格者 是一个有責任的人 誰知影你所講的話 全是花言巧語 一時做你走避 腹肚內的囡仔 強強就欲出世囉 已經無法度 閣再瞞騙社會的耳目 母囝前途 叫阮怎樣才好 公園路春天後 兩爿蟲聲亂操操 薄情郎做伊走 這款愛人誰敢交 想幼囝 出世日子已經到 可恨伊 僥心絕情無回頭 想起初戀彼暗 相親相愛 行著這條公園路 何等快樂甜蜜 愛情的結合 期待幼囝來出世 會得創造幸福的家庭 再三再四 望你毋通袂記 意外盡靠盡誤 變成一場空夢的青春悲喜曲 吳先生 你真真害人不淺啊 公園路孤單行 手提包袱哭出聲 求幸福變歹命 咬牙切齒叫君名 無想阮 應該也著想親囝 可恨伊 害阮墜落烏暗城
kong-hn̂g lōo gue̍h-àm mî tang-pîng tsí-ū kuí lia̍p tshinn phuānn tio̍h gún ba̍k-sái tih m̄-kánn tshut-siann to̍k khuànn thinn siūnn hit-sî siang-lâng kiat-ha̍p hó tsîng-ì siūnn kim-ji̍t sin-khu m̄-sī phóo-thong-sî Ngôo sian-sinn gún í-king bô lâi lī-khui pēnn-īnn ê khàn-hōo-hū sing-ua̍h sī buē-īng-ê--lah gún sī sìn-lāi lí ê uē sìn-lāi sian-sinn lí ê jîn-keh tān-sī tsit-tsūn ê guá í-king m̄-sī phóo-thong ê sin-khu--looh kong-hn̂g-pinn tōo-kuan thî king tshim lōo-tsuí tih pe̍h-i sim iu-būn bô guân-khì huân-ló sin-tiong ê kiánn-jî uî-lân sī m̄-kánn tuì lâng luān-kóng khí gún ūn-miā hiān-tsāi tshin-tshiūnn tsāi tsuí-kînn sū kàu jû-kim siōng huân-ló--ê tsiū-sī pak-tóo-lāi ê tsit-ê gín-á bô-guā-kú tō beh lâi tshut-sì lí nā-bô tuì pē-bú piáu-pi̍k ún-tsún lí-lán ê kiat-hun gún iā bô-bīn thang kìnn siā-huē ê lâng tsuân bāng sian-sinn m̄-thang buē-kì-tit lán tshoo-luân ê ióng-khì tsiah hó--ah kong-hn̂g-lāi hue-phang-bī hue-phang khó-pí gún kū-nî ting-lîng ko ài ē kì m̄-thang ài hue bô ài ki gún sim-lāi uī ko bô piàn ài kàu sí gún it-sing m̄-tsai hīng-hok ia̍h-sī pi kong-hn̂g lōo hōo mn̂g-mn̂g tuann-sin kiânn tshut pēnn-īnn mn̂g hīng-hok bāng tann bô-ǹg jú siūnn jú hūn kuah sim-tn̂g uī-tio̍h i ū tshù piàn-sîng m̄-kánn tńg khó-hūn i pàng gún bó-kiánn sia̋ng tam-tng po̍k-tsîng-lông gún sī sìn-lài lí sī tsi̍t-ê jîn-keh-tsiá sī tsi̍t-ê ū-tsik-jīm ê lâng sia̋ng tsai-iánn lí sóo kóng ê uē tsuân sī hua-giân khá-gí it-sî tsuè lí tsáu-phiah pak-tóo-lāi ê gín-á kiōng-kiōng tō beh tshut-sì--looh í-king bô-huat-tōo koh-tsài muâ-phiàn siā-huē ê ní-bo̍k bó-kiánn tsiân-tôo kiò gún tsuánn-iūnn tsiah hó kong-hn̂g lōo tshun-thinn āu lióng-pîng thâng-siann luān-tshau-tshau po̍k-tsîng-lông tsuè i tsáu tsit khuán ài-jîn sia̋ng kánn kau siūnn iù-kiánn tshut-sì ji̍t-tsí í-king kàu khó-hūn i hiau-sim tsua̍t-tsîng bô huê-thâu siūnn-khí tshoo-luân hit àm siòng-tshin siong-ài kiânn-tio̍h tsit tiâu kong-hn̂g lōo hô-tíng khuài-lo̍k tinn-bi̍t ài-tsîng ê kiat-ha̍p kî-thāi iù-kiánn lâi tshut-sì ē-tit tshòng-tsō hīng-hok ê ka-tîng tsài-sam tsài-sù bāng lí m̄-thang buē-kì ì-guā tsīn khò tsīn ngōo piàn-sîng tsi̍t tiûnn khang-bāng ê tshing-tshun pi-hí khik Ngôo sian-sinn lí tsin-tsin hāi-jîn put-tshián--ah kong-hn̂g lōo koo-tuann kiânn tshiú the̍h pau-ho̍k khàu tshut-siann kiû hīng-hok piàn pháinn-miā kā-gê tshiat-khí kiò kun miâ bô siūnn gún ìng-kai iā tio̍h siūnn tshin-kiánn khó-hūn i hāi gún tuī-lo̍h oo-àm-siânn