18100/《溫泉鄉的吉他》音樂廣播劇（IV of IV，完結篇） 中視閩南語猜迷演員&吳影廣播劇團演員聯合灌音 ------------------------------------------ ↓↓♪♫♪♩♬♪♩♬♪♩♫♪♫♪♩♬↓↓ 溫泉鄉日頭斜西 un-tsuânn-hiong ji̍t-thâu tshiâ-sai 啟明哭悲哀 Khe-bîng khàu pi-ai 真情真意相意愛 tsin-tsîng tsin-ì sio-ì-ài 無疑分東西 bô-gî hun tang-sai 啊~純情的目屎 ah~ sûn-tsîng ê ba̍k-sái 為著佳慧滴落來 uī-tio̍h Ka-huī tih--lo̍h-lâi 吉他伴阮 gì-tah phuānn gún 傷心流浪走天涯 siong-sim liû-lōng tsáu thian-gâi ↑↑♪♫♪♩♬♪♩♬♪♩♫♪♫♪♩♬↑↑ 明) 喔!佳慧 ooh! Ka-huī 你這个愛情的騙子 lí tsit ê ài-tsîng ê phiàn-tsír 我怨恨你 guá uàn-hūn lí 梅) 啟明兄 Khé-bîng hiann 你醉甲按呢生 lí tsuì kah án-ní-sinn 毋好來這个山頂 m̄-hó lâi tsit ê suann-tíng 緊轉來去啦 kín tǹg-lâi--khì--lah 明) 閃! siám! 我無醉 guá bô tsuì 梅) 啟明兄 Khé-bîng hiann 你 lí 明) 梅子 Muê-tsír 我對你真不住 guá tuì lí tsin put-tsū 恁爸爸欲死的時 lín pá-pah beh-sí ê sî 交代我𤆬你來臺灣 kau-tài guá tshuā lí lâi Tâi-uân 好好共你照顧 hó-hó kā lí tsiàu-kòo 無疑煞害你 bô-gî suah hāi lí 綴我佇咧艱苦 tè guá tī-leh kan-khóo 我對死去的老師 guá tuì sí--khì ê lāu-sir 真袂當過 tsin buē-tàng kè 梅) 啟明兄 Khé-bîng hiann 只要你莫為著吳小姐 tsí-iàu lí mài uī-tio̍h Gôo sió-tsiá 來自暴自棄 lâi tsīr-pō-tsīr-khì 緊發揮著你的音樂前途 kín huat-hui tio̍h lí ê im-ga̍k tsiân-tôo 按呢生 án-ní-sinn 阮爸爸一定袂怪你 gún pá-pah it-tīng buē kuài lí 明) 梅子 Muê-tsír 你若有同情我 lí nā ū tông-tsîng guá 應該會當 ìng-kai ē-tàng 了解我的痛苦才著 liáu-kái guá ê thòng-khóo tsiah tio̍h 鳥) 啟明大的喔! Khé-bîng tuā--ê ooh! 啟明大的啊! Khé-bîng tuā--ê ah! 喔!原來你就是走來遮 ooh! guân-lâi lí tiō-sī tsáu-lâi tsia 才會害我四界攏揣無喔 tsiah ē hāi guá sì-kè lóng tshē-bô--ooh 明) 粟鳥的 Tshik-tsiáu--ê 我也是佇咧揣你 guá iā-sī tī-leh tshē lí 行! kiânn! 閣再陪我來去啉燒酒 koh-tsài puê guá lâi-khì lim sio-tsiú 鳥) 欸!欸!起痟! eh! eh! khí-siáu! 哎喲!啟明大的仔 aih-ioh! Khé-bîng tuā--ê-á 啊你呔會閣 ah lí thài-ē koh 啉甲遮爾醉啦 lim kah tsiah-nī tsuì--lah 明) 我無醉 guá bô tsuì 行! kiânn! 緊閣陪我來去啉 kín koh puê guá lâi-khì lim 鳥) 哎喲!啟明大的仔 aih-ioh! Khé-bîng tuā--ê-á 啊眼科醫師講 ah gán-khe i-su kóng 你袂用得閣再受刺激liooh lí buē-īng-eh koh-tsài siū tshì-kik--liooh 啊嘛袂用得啉燒酒呢 ah mā buē-īng-ih lim sio-tsiú--neh 若是無乎 nā-sī bô--honnh 你的目睭是會青盲呢 lí ê ba̍k-tsiu sī ē tshinn-mî--neh 你誠實毋驚死 lí tsiânn-si̍t m̄-kiann sí 燒酒一直按呢 sio-tsiú it-ti̍t án-ne 頓三啉三頓啉喔 tǹg-sann lim sann-tǹg lim--ooh 明) 燒酒是我唯一的安慰者 sio-tsiú sī guá î-it ê an-uì-tsiá 鳥) 大的仔 tuā--ê-á 毋通啦 m̄-thang--lah 你身體有病佇咧 lí sin-thé ū pīnn tī--eh 若按呢逐工啉乎 nā án-ne ta̍k-kang lim--honnh 早慢你這條性命 tsá-bān lí tsit tiâu sìnn-miā 會報銷喔 ē pàu-siau--ooh 明) 心都留袂牢矣 sim to lâu buē-tiâu--ah 死哪有啥物可惜 sí ná-ū siánn-mih khó-sioh 鳥) 哎喲!大的仔 aih-ioh! tuā--ê-á 啊你盍會遮爾戇啦 ah lí khah-ē tsiah-nī gōng--lah 為著一个查某 uī-tio̍h tsi̍t-ê tsa-bóo 啊佇咧折磨家己的身軀 ah tī-leh tsiat-buâ ka-kī ê sin-khu 嗯!按呢盍有啥物價值 ngh! án-ne khah ū siánn-mih kè-ta̍t 明) 你袂當來了解我 lí buē-tàng lâi liáu-kái guá 你若毋陪我去 lí nā m̄ puê guá khì 我家己欲來去啉 guá ka-kī beh lâi-khì lim 明) 唅!啥物! hannh! siánn-mih! 這欉樹跤 tsit tsâng tshiū-kha 哪有一門墓佇咧 ná-ū tsi̍t-mn̂g bōo tī--leh 唅!楊啟明之墓 hannh! Iûnn Khe-bîng tsi bōo 佳慧拜泣 Ka-huī pài-khip 喔!啥物! ooh! siánn-mih! 佳慧反背我的愛 Ka-huī huán-puē guá ê ài 無打緊 bô-tá-kín 閣共我當做死去的人 koh kā guá tòng-tsuè sí--khì ê lâng 造這門墓 tsō tsit mn̂g bōng 喔!佳慧 ooh! Ka-huī 你對我太殘忍囉 lí tuì guá thài tsân-jím--looh 明) 唅!我的目睭 hannh! guá ê ba̍k-tsiu 我的目睭 guá ê ba̍k-tsiu 哪會疼按呢咧 ná ē thiànn án-ne--leh 鳥) 欸!啟明大的仔 eh! Khé-bîng tuā--ê-á 你是按怎啦 lí sī-án-tsuánn--lah 明) 無 bô 無怎樣 bô tsánn-iūnn 樹頂這兩身尪仔 tshiū-tíng tsit nn̄g-sian ang-á 永遠是牽牢牢 íng-uán sī khan tiâu-tiâu 這對我 tse tuì guá 是一種的諷刺佮侮辱 sī tsi̍t-tsióng ê hòng-tshì kah bú-jio̍k 我欲毀掉其中的一身 guá beh huí-tiāu kî-tiong ê tsi̍t-sian 鳥) 欸!啟明大的仔 eh! Khé-bîng tuā--ê-á 小等咧啦 sió-tán--leh-lah 啟明大的仔 Khé-bîng tuā--ê-á 啊你是佇咧神經是無 ah lí sī tī-leh sîn-king siooh 看著鬼 khuànn-tio̍h kuí 予鬼拍拍著 hōo kuí phah-phah--tio̍h 毋才會按呢 m̄-tsiah ē án-ne 尪仔是你佮佳慧 ang-á sī lí kah Ka-huī 親手刻起來 tshin-tshiú khik--khí-lâi 欲做記念的liooh beh tsuè kì-liām--ê liooh 啊你哪會欲共毀掉 ah lí ná ē beh kā huí-tiāu 明) 無你的代誌 bô lí ê tāi-tsì 閃! siám! 明) 吳佳慧 Gôo Ka-huī 咱的情咱的愛 lán ê tsîng lán ê ài 到遮已經斷囉 kàu tsia í-king tn̄g--looh 啊!我的目睭 ah! guá ê ba̍k-tsiu 我的目睭 guá ê ba̍k-tsiu 梅) 啟明兄 Khé-bîng hiann 你的目睭 lí ê ba̍k-tsiu 是怎樣是毋啦 sī tsánn-iūnn sī--m̄ lah 明) 我的目睭真疼 guá ê ba̍k-tsiu tsin thiànn 我的目睭真疼啦 guá ê ba̍k-tsiu tsin thiànn--lah 鳥) 啟明大的 Khé-bîng tuā--ê 啟明大的仔 Khé-bîng tuā--ê-á 梅) 啟明兄 Khé-bîng hiann 啟明兄 Khé-bîng hiann ＊＊＊＊＊＊＊＊＊＊＊＊＊＊＊＊＊＊＊ 慧) 啟明 Khé-bîng 佳慧閣來你的墓前 Ka-huī koh lâi lí ê bōo tsîng 共你獻花 kā lí hiàn-hue 你知毋 lí tsai--m̄ 啟明 Khé-bîng 啊!樹頂彼兩身尪仔 ah! tshiū-tíng hit nn̄g-sian ang-á 哪會一身無看著咧 ná ē tsi̍t-sian bô khuànn--eh leh 喔!我知 ooh! guá tsai 一定是啟明 it-tīng sī Khé-bîng 怨恨我嫁予敏南 uàn-hūn guá kè hōo Bín-lâm 所以才會顯聖 sóo-í tsiah ē hián-sìng 來共伊廢掉啦 lâi kā-i huì-tiāu--lah 啟明 Khé-bîng 佳慧對你真不住 Ka-huī tuì lí tsin put-tsū 最好你是𤆬我來去 tsuè hó lí sī tshuā guá lâi-khì 天國或者是地獄 thian-kok hi̍k-tsiá-sī tē-ga̍k 通予我向你贖罪啦 thang hōo guá hiòng lí sio̍k-tsuē--lah 啟明 Khé-bîng ＊＊＊＊＊＊＊＊＊＊＊＊＊＊＊＊＊＊＊ ↓↓♪♫♪♩♬♪♩♬♪♩♫♪♫♪♩♬↓↓ 溫泉鄉寒風微微 un-tsuânn-hiong hân-hong bî-bî 啟明哭哀悲 Khé-bîng khàu ai-pi 叫出佳慧你名字 kiò-tshut Ka-huī lí miâ-jī 傷心珠淚滴 siong-sim tsu-luī tih 啊~你咱欲相見 ah~ lí lán beh sann-kìnn 著愛等待後出世 tio̍h-ài tán-thāi āu-tshut-sì 吉他彈出 gì-tah tuânn tshut 哀愁悲慘斷腸詩 ai-tshiû pi-tshám tuān-tn̂g-si ↑↑♪♫♪♩♬♪♩♬♪♩♫♪♫♪♩♬↑↑ 明) 梅子 Muê-tsír 大樹跤到位未 tuā-tshiū-kha kàu-uī--buē 梅) 到矣啦 kàu--ah lah 佇咧你的面頭前 tī-eh lí ê bīn-thâu-tsîng 你用手摸 lí īng tshiú moo 就摸會著 tiō moo ē-tio̍h 明) 好 hó 你小踮咧樹仔跤歇睏一下 lí sió tiàm-eh tshiū-á kha hioh-khùn--tsi̍t-ē 梅) 好 hó 明) 喔!難忘又可恨的黃昏嶺 ooh! lân-bōng iū khó-hūn ê hông-hun-niá 我佮吳佳慧 guá kah Ngôo Ka-huī 是踮遮來開戀花 sī tiàm tsia lâi khui luân-hue 誰知 siánn tsai 受著環境的阻礙 siū-tio̍h khuân-kíng ê tsóo-gāi 害阮這對戀花 hāi gún tsit tuì luân-hue 袂當來結戀子 buē-tàng lâi kiat luân-tsír 喔~這是啥物人害阮的咧 ooh~ tse sī siánn-mih lâng hāi gún ê--leh 難道 lân-tō 這敢是阮的無緣嘛 tse kám-sī gún ê bô-iân--mah 慧) 啊!你! ah! lí! 明) 你 lí 你是啥物人 lí sī siánn-mih lâng 慧) 你 lí 你敢毋是啟明咧 lí kám m̄-sī Khé-bîng--leh 明) 嗯!你哪會捌我 ngh! lí ná ē pat guá 慧) 啊!啟明 ah! Khé-bîng 你無死 lí bô sí 明) 唅!你 hannh! lí 你是 lí sī 慧) 我是佳慧啦 guá sī Ka-huī--lah 啟明 Khé-bîng 你講 lí kóng 你為怎樣哪會無死咧 lí uī-tsánn-iūnn ná ē bô sí--leh 明) 哈哈哈哈哈! ha-ha ha-ha ha! 我專工紮禮物 guá tsuan-kang tsah lé-bu̍t 倒轉來欲祝福你 tò-tńg-lâi beh tsiok-hok lí 佮黃敏南的婚禮 kah N̂g Bín-lâm ê hun-lé 我欲哪會死咧 guá beh ná ē sí--leh 慧) 啟明 Khé-bîng 請你莫講話 tshiánn lí mài kóng-uē 來傷我的心好無 lâi siong guá ê sim hó--bô 我是 guá sī... 明) 佳慧 Ka-huī 欸~毋是 eh~ m̄-sī 黃太太 N̂g thài-thài 我所紮轉來的禮物 guá sóo tsah--tńg-lâi ê lé-bu̍t 就是我這兩蕊失明的目睭 tsiū-sī guá tsit nn̄g-luí sit-bîng ê ba̍k-tsiu 大概你敢若真歡喜接受乎 tāi-khài lí kánn tsin huann-hí tsiap-siū--honnh 慧) 啥物!你青盲 siánn-mih! lí tshinn-mî 明) 著 tio̍h 我青盲 guá tshinn-mî 慧) 啟明 Khé-bîng 我問你 guá mn̄g lí 樹頂這兩身尪仔 tshiū-tíng tsit nn̄g-sian ang-á 是毋是你共伊毀掉一身 sī-m̄-sī lí kā-i huí-tiāu tsi̍t-sian 明) 是 sī 慧) 你為怎樣 lí uī-tsánn-iūnn 欲按呢生做咧 beh án-ní-sinn tsuè--leh 明) 因為其中的一身 in-uī kî-tiong ê tsi̍t-sian 已經變心囉 í-king piàn-sim--looh 閣留踮咧遮 koh lâu tiàm-eh tsia 欲創啥物 beh tshòng siánn-mih 慧) 喔!啟明 ooh! Khé-bîng 你太袂當了解 lí thài buē-tàng liáu-kái 佳慧純情的心囉 Ka-huī sûn-tsîng ê sim--looh 明) 會 ē 我會當了解 guá ē-tàng liáu-kái 你是一个拜金主義者 lí sī tsi̍t-ê pài-kim-tsú-gī-tsiá 黃敏南是一个 N̂g Bín-lâm sī tsi̍t-ê 百萬富翁的少爺 pah-bān hù-ong ê siàu-iâ 你嫁予伊 lí kè hōo i 會當來享受榮華富貴 ē-tàng lâi hiáng-siū îng-huâ hù-kuì 你會當 lí ē-tàng... 慧) 好矣!好矣! hó--ah! hó--ah! 請你莫講話來侮辱我 tshiánn lí mài kóng-uē lâi bú-jio̍k guá 明) 侮辱你 bú-jio̍k lí 我侮辱你 guá bú-jio̍k lí 哈哈哈哈哈哈! ha-ha ha-ha ha-ha! 事實會當證明一切 sīr-si̍t ē-tàng tsìng-bîng it-tshè 我敢有講毋著 guá kám ū kóng m̄-tio̍h 是毋 sī--m̄ 慧) 啟明 Khé-bîng 無論你怎樣 bô-lūn lí tsánn-iūnn 諷刺我 hòng-tshì guá 侮辱我 bú-jio̍k guá 攏無要緊 lóng bô-iàu-kín 但是 tān-sī 你愛聽我講 lí ài thiann guá kóng 明) 我已經 guá í-king 予你認定是死去的人 hōo lí jīn-tīng sī sí--khì ê lâng 我無啥物通好講 guá bô-siánn-mih thang-hó kóng 我欲抱著悲痛的心情 guá beh phāu tio̍h pi-thòng ê sim-tsîng 來去遙遠的所在 lâi-khì iâu-uán ê sóo-tsāi 祝福你佮黃敏南 tsiok-hok lí kah N̂g Bín-lâm 會當白頭皆老 ē-tàng pi̍k-thiô kai-nóo 再見 tsài-kiàn 明) 梅子 Muê-tsír 緊𤆬我倒轉來去 kín tshuā guá tò-tńg--lâi-khì 梅) 好啦 hó--lah 慧) 啟明!啟明!啟明! Khé-bîng! Khé-bîng! Khé-bîng! 喔!天啊! ooh! thian--ah! 啟明無死倒轉來 Khé-bîng bô sí tò-tńg--lâi 我 guá 我是欲怎樣咧 guá sī beh tsánn-iūnn--leh ＊＊＊＊＊＊＊＊＊＊＊＊＊＊＊＊＊＊＊ 慧) 粟鳥仔 tshik-tsiáu-á 照你這陣所講的經過 tsiàu lí tsit-tsūn sóo kóng ê king-kè 啟明為著伊的先生發生車厄 Khé-bîng uī-tio̍h i ê sian-sinn huat-sing tshia-eh 所以無坐彼班失事的飛機倒轉來 sóo-í bô tsē hit pan sit-sū ê hui-ki tò-tńg--lâi 是毋 sī--m̄ 鳥) 諾啦! hiooh--lah! 南) 我占楊啟明的愛 guá tsiàm Iûnn Khe-bîng ê ài 我實在對伊真袂當過 guá si̍t-tsāi tuì i tsin buē-tàng kè 鳥) 啊~著猴囉! ah~ tio̍h-kâu--looh! 敏南啊 Bín-lâm--ah 這馬毋是 tsit-má m̄-sī 講遮的話的時陣啦 kóng tsia-ê uē ê sî-tsūn--lah 啟明破病真傷重liooh Khé-bîng phuà-pīnn tsin siong-tiōng--liooh 恁兩个翁某 lín nn̄g-ê ang-bóo 著趕緊去共看覓咧 to̍h kuánn-kín khì kā khuànn-māi--leh 若是無 nā-sī bô 欲見伊最後一面 beh kìnn i tsuè-āu tsi̍t-bīn 恐驚仔赴袂著喔 khióng-kiann-á hù buē-tio̍h--ooh 慧) 啊!敏南 ah! Bín-lâm 咱趕緊鬥陣 lán kuánn-kín tàu-tīn 來去看啟明 lâi-khì khuànn Khé-bîng ＊＊＊＊＊＊＊＊＊＊＊＊＊＊＊＊＊＊＊ 明) 佳慧 Ka-huī 一切的代誌 it-tshè ê tāi-tsì 粟鳥的已經共我講過 Tshik-tsiáu--ê í-king kā guá kóng--kè 你為著誤會我死去 lí uī-tio̍h gōo-huē guá sí--khì 佮欲盡孝心 kah beh tsīn hàu-sim 才來嫁予敏南 tsiah lâi kè hōo Bín-lâm 這我袂見怪你 tse guá buē kiàn-kuài lí 頂一工 tíng tsi̍t-kang 佇咧黃昏嶺 tī-eh hông-hun-niá 我用話共你侮辱 guá iōng uē kā lí bú-jio̍k 請你原諒我 tshiánn lí guân-liōng guá 慧) 啟明 Khé-bîng 我袂怪你 guá buē kuài lí 你毋好想遐的 lí m̄-hó siūnn hia--ê 做你好好養病 tsuè lí hó-hó ióng-pīnn 明) 佳慧 Ka-huī 敏南 Bín-lâm 我有一項代誌 guá ū tsi̍t-hāng tāi-tsì 欲拜託恁 beh pài-thok lín 南) 啟明 Khé-bîng 有啥物代誌 ū sí-mih tāi-tsì 做你講 tsuè lí kóng 哪會著拜託 ná-ē tio̍h pài-thok 明) 我已經無望矣 guá í-king bô-bāng--ah 我若死了後 guá nā sí liáu-āu 拜託恁翁某 pài-thok lín ang-bóo 替我照顧 thuè guá tsiàu-kòo 阮老師的查某囝梅子 gún lāu-su ê tsa-bóo-kiánn Muê-tsír 好毋 hó--m̄ 慧) 啟明 Khé-bîng 梅子的代誌 Muê-tsír ê tāi-tsì 做你放心 tsuè lí hòng-sim 我會當作親小妹 guá ē tòng-tsoh tshin sió-bē 來共伊疼惜 lâi kā-i thiànn-sioh 明) 梅子 Muê-tsír 梅) 啟明兄 Khé-bîng hiann 明) 我已經將你 guá í-king tsiong lí 交代予佳慧囉 kau-tài hōo Ka-huī--looh 以後怹翁某 í-āu in ang-bóo 會替我照顧你 ē thuè guá tsiàu-kòo lí 你著愛乖乖聽人的話乎 lí tio̍h-ài kuai-kuai thiann lâng ê uē--honnh 梅) 我知影啦 guá tsai-iánn--lah 啟明兄 Khé-bîng hiann 明) 粟鳥的 Tshik-tsiáu--ê 鳥) 喂!啟明大的 ueh! Khé-bîng tuā--ê 明) 你是我死忠的好朋友 lí sī guá sí-tiong ê hó-pîng-iú 在我欲臨死的進前 tsāi guá beh lîm-sí ê tsìn-tsîng 欲共你苦勸一句話 beh kā lí khóo-khǹg tsi̍t-kù uē 你愛認真拍拚 lí ài jīn-tsin phah-piànn 看會當早一日 khuànn ē-tàng tsá tsi̍t-ji̍t 來成家立業無 lâi sîng-ka li̍p-gia̍p--bô 鳥) 嗯!我知影啦 ngh! guá tsai-iánn--lah 啟明大的啊 Khé-bîng tuā--ê--ah 你毋好烏白想啦 lí m̄-hó oo-pe̍h siūnn--lah 你的病 lí ê pīnn 一定會好起來的啦 it-tīng ē hó--khí-lâi ê--lah 明) 無望囉 bô-bāng--looh 佳慧 Ka-huī 這世人 tsit-sì-lâng 咱無法度通結成鴛鴦 lán bô-huat-tōo thang kiat-sîng uan-iunn 但願後世人有緣 tān-guān āu-sì-lâng ū-iân 咱才閣來做堆 lán tsiah-koh lâi tsuè-tui 最後 tsuè-āu 我欲祝恁翁某 guá beh tsiok lín ang-bóo 永浴愛河 íng-i̍k ài-hô 恩恩愛愛 un-un-ài-ài 白頭偕老 pi̍k-thiô kai-nóo 我 guá 我欲佮恁逐家 guá beh kah lín ta̍k-ke 永 íng 永別囉 íng pa̍t--looh 慧) 啟明! Khé-bîng! 南) 啟明! Khé-bîng! 梅) 啟明兄! Khé-bîng hiann 鳥) 啟明大的啊! Khé-bîng tuā--ê ah 啟明大的喔! Khé-bîng tuā--ê--ooh 慧) 啟明! Khé-bîng! 南) 啟明! Khé-bîng! 梅) 啟明兄! Khé-bîng hiann 鳥) 啟明大的! Khé-bîng tuā--ê ＊＊＊＊＊＊＊＊＊＊＊＊＊＊＊＊＊＊＊ ↓↓(旁白)---(旁白)---(旁白)↓↓ 不幸的楊啟明 put-hīng ê Iûnn Khe-bîng 已經與世長別了 í-king ír-sè tiông-pia̍t--liáu 多情的吳佳慧 to-tsîng ê Ngôo Ka-huī 將伊埋葬在 tsiong i mâi-tsòng tsāi 怹兩个人過去海誓山盟 in nn̄g-ê lâng kè-khì hái-sè san-bîng 黃昏嶺的大樹跤 hông-hun-niá ê tuā-tshiū-kha 尤其是 iû-kî sī 無論好天的日子 bô-lūn hó-thinn ê ji̍t-tsí 或者是雨來的日子 hi̍k-tsiá-sī hōo lâi ê ji̍t-tsí 純情的吳佳慧 sûn-tsîng ê Ngôo Ka-huī 每日攏是 muí-ji̍t lóng-sī 來啟明的墓前獻花 lâi Khé-bîng ê bōo tsîng hiàn-hue 愛神怎樣會遮爾殘忍 ài-sîn tsánn-iūnn ē tsiah-nī tsân-jím 將怹這對恩愛的情侶 tsiong in tsit tuì un-ài ê tsîng-lū 來共伊拆分離 lâi kā-i thiah hun-lî 啊!怹的悲戀史 ah! in ê pi-luân sír 真使人同情 tsin sír-lâng tông-tsîng 願天下有情人 guān thian-hā iú-tsîng-jîn 掬淚同聲一哭 kiok-luī tông-siann it-khàu 春去夏來 tshun khì hē lâi 迎秋又送冬 ngiâ tshiu iū sàng tang 日子經過 ji̍t-tsí king-kè 已經十年囉 í-king tsa̍p-nî--looh 楊啟明的墓 Iûnn Khe-bîng ê bōo 這一日 tsit tsi̍t-ji̍t 又閣一个中年婦人 iū-koh tsi̍t-ê tiong-liân hū-jîn 佮一个少女 kah tsi̍t-ê siàu-lú 來佇咧共伊獻花 lâi tī-leh kā-i hiàn-hue 怹毋是別人 in m̄-sī pa̍t-lâng 就是多情的吳佳慧 tsiū-sī to-tsîng ê Ngôo Ka-huī 佮著啟明佇日本𤆬轉來的 kah tio̍h Khé-bîng tī Ji̍t-pún tshuā--tńg-lâi ê 吉村梅子 Kiat-tshun Muê-tsír ↑↑(旁白)---(旁白)---(旁白)↑↑ 慧) 啟明 Khé-bîng 佳慧照你臨死的交代 Ka-huī tsiàu lí lîm-sí ê kau-tài 已經將梅子 í-king tsiong Muê-tsír 照顧甲遮爾大漢 tsiàu-kòo kah tsiah-nī tuā-hàn 你大概會當安息吧 lí tāi-khài ē-tàng an-sik--pah 梅) 啟明兄 Khé-bîng hiann ↓↓♪♫♪♩♬♪♩♬♪♩♫♪♫♪♩♬↓↓ 溫泉鄉寒風微微 un-tsuânn-hiong hân-hong bî-bî 啟明哭哀悲 Khé-bîng khàu ai-pi 叫出佳慧你名字 kiò-tshut Ka-huī lí miâ-jī 傷心珠淚滴 siong-sim tsu-luī tih 啊~你咱欲相見 ah~ lí lán beh sann-kìnn 著愛等待後出 tio̍h-ài tán-thāi āu-tshut-sì 吉他彈出 gì-tah tuânn tshut 哀愁悲慘斷腸詩 ai-tshiû pi-tshám tuān-tn̂g-si ↑↑♪♫♪♩♬♪♩♬♪♩♫♪♫♪♩♬↑↑ 【全劇終】 ------------------------------------------ →
溫泉鄉日頭斜西 啟明哭悲哀 真情真意相意愛 無疑分東西 啊~純情的目屎 為著佳慧滴落來 吉他伴阮 傷心流浪走天涯 喔!佳慧 你這个愛情的騙子 我怨恨你 啟明兄 你醉甲按呢生 毋好來這个山頂 緊轉來去啦 我無醉 啟明兄 梅子 我對你真不住 恁爸爸欲死的時 交代我𤆬你來臺灣 好好共你照顧 無疑煞害你 綴我佇咧艱苦 我對死去的老師 真袂當過 啟明兄 只要你莫為著吳小姐 來自暴自棄 緊發揮著你的音樂前途 按呢生 阮爸爸一定袂怪你 梅子 你若有同情我 應該會當 了解我的痛苦才著 啟明大的喔! 啟明大的啊! 喔!原來你就是走來遮 才會害我四界攏揣無喔 粟鳥的 我也是佇咧揣你 閣再陪我來去啉燒酒 欸!欸!起痟! 哎喲!啟明大的仔 啊你呔會閣 啉甲遮爾醉啦 我無醉 緊閣陪我來去啉 哎喲!啟明大的仔 啊眼科醫師講 你袂用得閣再受刺激liooh 啊嘛袂用得啉燒酒呢 若是無乎 你的目睭是會青盲呢 你誠實毋驚死 燒酒一直按呢 頓三啉三頓啉喔 燒酒是我唯一的安慰者 大的仔 毋通啦 你身體有病佇咧 若按呢逐工啉乎 早慢你這條性命 會報銷喔 心都留袂牢矣 死哪有啥物可惜 哎喲!大的仔 啊你盍會遮爾戇啦 為著一个查某 啊佇咧折磨家己的身軀 嗯!按呢盍有啥物價值 你袂當來了解我 你若毋陪我去 我家己欲來去啉 唅!啥物! 這欉樹跤 哪有一門墓佇咧 唅!楊啟明之墓 佳慧拜泣 喔!啥物! 佳慧反背我的愛 無打緊 閣共我當做死去的人 造這門墓 喔!佳慧 你對我太殘忍囉 唅!我的目睭 我的目睭 哪會疼按呢咧 欸!啟明大的仔 你是按怎啦 無怎樣 樹頂這兩身尪仔 永遠是牽牢牢 這對我 是一種的諷刺佮侮辱 我欲毀掉其中的一身 欸!啟明大的仔 小等咧啦 啟明大的仔 啊你是佇咧神經是無 看著鬼 予鬼拍拍著 毋才會按呢 尪仔是你佮佳慧 親手刻起來 欲做記念的liooh 啊你哪會欲共毀掉 無你的代誌 吳佳慧 咱的情咱的愛 到遮已經斷囉 啊!我的目睭 我的目睭 啟明兄 你的目睭 是怎樣是毋啦 我的目睭真疼 我的目睭真疼啦 啟明大的 啟明大的仔 啟明兄 啟明兄 啟明 佳慧閣來你的墓前 共你獻花 你知毋 啟明 啊!樹頂彼兩身尪仔 哪會一身無看著咧 喔!我知 一定是啟明 怨恨我嫁予敏南 所以才會顯聖 來共伊廢掉啦 啟明 佳慧對你真不住 最好你是𤆬我來去 天國或者是地獄 通予我向你贖罪啦 啟明 溫泉鄉寒風微微 啟明哭哀悲 叫出佳慧你名字 傷心珠淚滴 啊~你咱欲相見 著愛等待後出世 吉他彈出 哀愁悲慘斷腸詩 梅子 大樹跤到位未 到矣啦 佇咧你的面頭前 你用手摸 就摸會著 你小踮咧樹仔跤歇睏一下 喔!難忘又可恨的黃昏嶺 我佮吳佳慧 是踮遮來開戀花 誰知 受著環境的阻礙 害阮這對戀花 袂當來結戀子 喔~這是啥物人害阮的咧 難道 這敢是阮的無緣嘛 啊!你! 你是啥物人 你敢毋是啟明咧 嗯!你哪會捌我 啊!啟明 你無死 唅!你 你是 我是佳慧啦 啟明 你講 你為怎樣哪會無死咧 哈哈哈哈哈! 我專工紮禮物 倒轉來欲祝福你 佮黃敏南的婚禮 我欲哪會死咧 啟明 請你莫講話 來傷我的心好無 我是 佳慧 欸~毋是 黃太太 我所紮轉來的禮物 就是我這兩蕊失明的目睭 大概你敢若真歡喜接受乎 啥物!你青盲 我青盲 啟明 我問你 樹頂這兩身尪仔 是毋是你共伊毀掉一身 你為怎樣 欲按呢生做咧 因為其中的一身 已經變心囉 閣留踮咧遮 欲創啥物 喔!啟明 你太袂當了解 佳慧純情的心囉 我會當了解 你是一个拜金主義者 黃敏南是一个 百萬富翁的少爺 你嫁予伊 會當來享受榮華富貴 你會當 好矣!好矣! 請你莫講話來侮辱我 侮辱你 我侮辱你 哈哈哈哈哈哈! 事實會當證明一切 我敢有講毋著 是毋 啟明 無論你怎樣 諷刺我 侮辱我 攏無要緊 但是 你愛聽我講 我已經 予你認定是死去的人 我無啥物通好講 我欲抱著悲痛的心情 來去遙遠的所在 祝福你佮黃敏南 會當白頭皆老 再見 梅子 緊𤆬我倒轉來去 好啦 啟明!啟明!啟明! 喔!天啊! 啟明無死倒轉來 我是欲怎樣咧 粟鳥仔 照你這陣所講的經過 啟明為著伊的先生發生車厄 所以無坐彼班失事的飛機倒轉來 是毋 諾啦! 我占楊啟明的愛 我實在對伊真袂當過 啊~著猴囉! 敏南啊 這馬毋是 講遮的話的時陣啦 啟明破病真傷重liooh 恁兩个翁某 著趕緊去共看覓咧 若是無 欲見伊最後一面 恐驚仔赴袂著喔 啊!敏南 咱趕緊鬥陣 來去看啟明 佳慧 一切的代誌 粟鳥的已經共我講過 你為著誤會我死去 佮欲盡孝心 才來嫁予敏南 這我袂見怪你 頂一工 佇咧黃昏嶺 我用話共你侮辱 請你原諒我 啟明 我袂怪你 你毋好想遐的 做你好好養病 佳慧 敏南 我有一項代誌 欲拜託恁 啟明 有啥物代誌 做你講 哪會著拜託 我已經無望矣 我若死了後 拜託恁翁某 替我照顧 阮老師的查某囝梅子 好毋 啟明 梅子的代誌 做你放心 我會當作親小妹 來共伊疼惜 梅子 啟明兄 我已經將你 交代予佳慧囉 以後怹翁某 會替我照顧你 你著愛乖乖聽人的話乎 我知影啦 啟明兄 粟鳥的 喂!啟明大的 你是我死忠的好朋友 在我欲臨死的進前 欲共你苦勸一句話 你愛認真拍拚 看會當早一日 來成家立業無 嗯!我知影啦 啟明大的啊 你毋好烏白想啦 你的病 一定會好起來的啦 無望囉 佳慧 這世人 咱無法度通結成鴛鴦 但願後世人有緣 咱才閣來做堆 最後 我欲祝恁翁某 永浴愛河 恩恩愛愛 白頭偕老 我欲佮恁逐家 永別囉 啟明! 啟明! 啟明兄! 啟明大的啊! 啟明大的喔! 啟明! 啟明! 啟明兄! 啟明大的!
un-tsuânn-hiong ji̍t-thâu tshiâ-sai Khe-bîng khàu pi-ai tsin-tsîng tsin-ì sio-ì-ài bô-gî hun tang-sai ah~ sûn-tsîng ê ba̍k-sái uī-tio̍h Ka-huī tih--lo̍h-lâi gì-tah phuānn gún siong-sim liû-lōng tsáu thian-gâi ooh! Ka-huī lí tsit ê ài-tsîng ê phiàn-tsír guá uàn-hūn lí Khé-bîng hiann lí tsuì kah án-ní-sinn m̄-hó lâi tsit ê suann-tíng kín tǹg-lâi--khì--lah guá bô tsuì Khé-bîng hiann Muê-tsír guá tuì lí tsin put-tsū lín pá-pah beh-sí ê sî kau-tài guá tshuā lí lâi Tâi-uân hó-hó kā lí tsiàu-kòo bô-gî suah hāi lí tè guá tī-leh kan-khóo guá tuì sí--khì ê lāu-sir tsin buē-tàng kè Khé-bîng hiann tsí-iàu lí mài uī-tio̍h Gôo sió-tsiá lâi tsīr-pō-tsīr-khì kín huat-hui tio̍h lí ê im-ga̍k tsiân-tôo án-ní-sinn gún pá-pah it-tīng buē kuài lí Muê-tsír lí nā ū tông-tsîng guá ìng-kai ē-tàng liáu-kái guá ê thòng-khóo tsiah tio̍h Khé-bîng tuā--ê ooh! Khé-bîng tuā--ê ah! ooh! guân-lâi lí tiō-sī tsáu-lâi tsia tsiah ē hāi guá sì-kè lóng tshē-bô--ooh Tshik-tsiáu--ê guá iā-sī tī-leh tshē lí koh-tsài puê guá lâi-khì lim sio-tsiú eh! eh! khí-siáu! aih-ioh! Khé-bîng tuā--ê-á ah lí thài-ē koh lim kah tsiah-nī tsuì--lah guá bô tsuì kín koh puê guá lâi-khì lim aih-ioh! Khé-bîng tuā--ê-á ah gán-khe i-su kóng lí buē-īng-eh koh-tsài siū tshì-kik--liooh ah mā buē-īng-ih lim sio-tsiú--neh nā-sī bô--honnh lí ê ba̍k-tsiu sī ē tshinn-mî--neh lí tsiânn-si̍t m̄-kiann sí sio-tsiú it-ti̍t án-ne tǹg-sann lim sann-tǹg lim--ooh sio-tsiú sī guá î-it ê an-uì-tsiá tuā--ê-á m̄-thang--lah lí sin-thé ū pīnn tī--eh nā án-ne ta̍k-kang lim--honnh tsá-bān lí tsit tiâu sìnn-miā ē pàu-siau--ooh sim to lâu buē-tiâu--ah sí ná-ū siánn-mih khó-sioh aih-ioh! tuā--ê-á ah lí khah-ē tsiah-nī gōng--lah uī-tio̍h tsi̍t-ê tsa-bóo ah tī-leh tsiat-buâ ka-kī ê sin-khu ngh! án-ne khah ū siánn-mih kè-ta̍t lí buē-tàng lâi liáu-kái guá lí nā m̄ puê guá khì guá ka-kī beh lâi-khì lim hannh! siánn-mih! tsit tsâng tshiū-kha ná-ū tsi̍t-mn̂g bōo tī--leh hannh! Iûnn Khe-bîng tsi bōo Ka-huī pài-khip ooh! siánn-mih! Ka-huī huán-puē guá ê ài bô-tá-kín koh kā guá tòng-tsuè sí--khì ê lâng tsō tsit mn̂g bōng ooh! Ka-huī lí tuì guá thài tsân-jím--looh hannh! guá ê ba̍k-tsiu guá ê ba̍k-tsiu ná ē thiànn án-ne--leh eh! Khé-bîng tuā--ê-á lí sī-án-tsuánn--lah bô tsánn-iūnn tshiū-tíng tsit nn̄g-sian ang-á íng-uán sī khan tiâu-tiâu tse tuì guá sī tsi̍t-tsióng ê hòng-tshì kah bú-jio̍k guá beh huí-tiāu kî-tiong ê tsi̍t-sian eh! Khé-bîng tuā--ê-á sió-tán--leh-lah Khé-bîng tuā--ê-á ah lí sī tī-leh sîn-king siooh khuànn-tio̍h kuí hōo kuí phah-phah--tio̍h m̄-tsiah ē án-ne ang-á sī lí kah Ka-huī tshin-tshiú khik--khí-lâi beh tsuè kì-liām--ê liooh ah lí ná ē beh kā huí-tiāu bô lí ê tāi-tsì Gôo Ka-huī lán ê tsîng lán ê ài kàu tsia í-king tn̄g--looh ah! guá ê ba̍k-tsiu guá ê ba̍k-tsiu Khé-bîng hiann lí ê ba̍k-tsiu sī tsánn-iūnn sī--m̄ lah guá ê ba̍k-tsiu tsin thiànn guá ê ba̍k-tsiu tsin thiànn--lah Khé-bîng tuā--ê Khé-bîng tuā--ê-á Khé-bîng hiann Khé-bîng hiann Khé-bîng Ka-huī koh lâi lí ê bōo tsîng kā lí hiàn-hue lí tsai--m̄ Khé-bîng ah! tshiū-tíng hit nn̄g-sian ang-á ná ē tsi̍t-sian bô khuànn--eh leh ooh! guá tsai it-tīng sī Khé-bîng uàn-hūn guá kè hōo Bín-lâm sóo-í tsiah ē hián-sìng lâi kā-i huì-tiāu--lah Khé-bîng Ka-huī tuì lí tsin put-tsū tsuè hó lí sī tshuā guá lâi-khì thian-kok hi̍k-tsiá-sī tē-ga̍k thang hōo guá hiòng lí sio̍k-tsuē--lah Khé-bîng un-tsuânn-hiong hân-hong bî-bî Khé-bîng khàu ai-pi kiò-tshut Ka-huī lí miâ-jī siong-sim tsu-luī tih ah~ lí lán beh sann-kìnn tio̍h-ài tán-thāi āu-tshut-sì gì-tah tuânn tshut ai-tshiû pi-tshám tuān-tn̂g-si Muê-tsír tuā-tshiū-kha kàu-uī--buē kàu--ah lah tī-eh lí ê bīn-thâu-tsîng lí īng tshiú moo tiō moo ē-tio̍h lí sió tiàm-eh tshiū-á kha hioh-khùn--tsi̍t-ē ooh! lân-bōng iū khó-hūn ê hông-hun-niá guá kah Ngôo Ka-huī sī tiàm tsia lâi khui luân-hue siánn tsai siū-tio̍h khuân-kíng ê tsóo-gāi hāi gún tsit tuì luân-hue buē-tàng lâi kiat luân-tsír ooh~ tse sī siánn-mih lâng hāi gún ê--leh lân-tō tse kám-sī gún ê bô-iân--mah ah! lí! lí sī siánn-mih lâng lí kám m̄-sī Khé-bîng--leh ngh! lí ná ē pat guá ah! Khé-bîng lí bô sí hannh! lí lí sī guá sī Ka-huī--lah Khé-bîng lí kóng lí uī-tsánn-iūnn ná ē bô sí--leh ha-ha ha-ha ha! guá tsuan-kang tsah lé-bu̍t tò-tńg-lâi beh tsiok-hok lí kah N̂g Bín-lâm ê hun-lé guá beh ná ē sí--leh Khé-bîng tshiánn lí mài kóng-uē lâi siong guá ê sim hó--bô guá sī... Ka-huī eh~ m̄-sī N̂g thài-thài guá sóo tsah--tńg-lâi ê lé-bu̍t tsiū-sī guá tsit nn̄g-luí sit-bîng ê ba̍k-tsiu tāi-khài lí kánn tsin huann-hí tsiap-siū--honnh siánn-mih! lí tshinn-mî guá tshinn-mî Khé-bîng guá mn̄g lí tshiū-tíng tsit nn̄g-sian ang-á sī-m̄-sī lí kā-i huí-tiāu tsi̍t-sian lí uī-tsánn-iūnn beh án-ní-sinn tsuè--leh in-uī kî-tiong ê tsi̍t-sian í-king piàn-sim--looh koh lâu tiàm-eh tsia beh tshòng siánn-mih ooh! Khé-bîng lí thài buē-tàng liáu-kái Ka-huī sûn-tsîng ê sim--looh guá ē-tàng liáu-kái lí sī tsi̍t-ê pài-kim-tsú-gī-tsiá N̂g Bín-lâm sī tsi̍t-ê pah-bān hù-ong ê siàu-iâ lí kè hōo i ē-tàng lâi hiáng-siū îng-huâ hù-kuì lí ē-tàng... hó--ah! hó--ah! tshiánn lí mài kóng-uē lâi bú-jio̍k guá bú-jio̍k lí guá bú-jio̍k lí ha-ha ha-ha ha-ha! sīr-si̍t ē-tàng tsìng-bîng it-tshè guá kám ū kóng m̄-tio̍h sī--m̄ Khé-bîng bô-lūn lí tsánn-iūnn hòng-tshì guá bú-jio̍k guá lóng bô-iàu-kín tān-sī lí ài thiann guá kóng guá í-king hōo lí jīn-tīng sī sí--khì ê lâng guá bô-siánn-mih thang-hó kóng guá beh phāu tio̍h pi-thòng ê sim-tsîng lâi-khì iâu-uán ê sóo-tsāi tsiok-hok lí kah N̂g Bín-lâm ē-tàng pi̍k-thiô kai-nóo tsài-kiàn Muê-tsír kín tshuā guá tò-tńg--lâi-khì hó--lah Khé-bîng! Khé-bîng! Khé-bîng! ooh! thian--ah! Khé-bîng bô sí tò-tńg--lâi guá sī beh tsánn-iūnn--leh tshik-tsiáu-á tsiàu lí tsit-tsūn sóo kóng ê king-kè Khé-bîng uī-tio̍h i ê sian-sinn huat-sing tshia-eh sóo-í bô tsē hit pan sit-sū ê hui-ki tò-tńg--lâi sī--m̄ hiooh--lah! guá tsiàm Iûnn Khe-bîng ê ài guá si̍t-tsāi tuì i tsin buē-tàng kè ah~ tio̍h-kâu--looh! Bín-lâm--ah tsit-má m̄-sī kóng tsia-ê uē ê sî-tsūn--lah Khé-bîng phuà-pīnn tsin siong-tiōng--liooh lín nn̄g-ê ang-bóo to̍h kuánn-kín khì kā khuànn-māi--leh nā-sī bô beh kìnn i tsuè-āu tsi̍t-bīn khióng-kiann-á hù buē-tio̍h--ooh ah! Bín-lâm lán kuánn-kín tàu-tīn lâi-khì khuànn Khé-bîng Ka-huī it-tshè ê tāi-tsì Tshik-tsiáu--ê í-king kā guá kóng--kè lí uī-tio̍h gōo-huē guá sí--khì kah beh tsīn hàu-sim tsiah lâi kè hōo Bín-lâm tse guá buē kiàn-kuài lí tíng tsi̍t-kang tī-eh hông-hun-niá guá iōng uē kā lí bú-jio̍k tshiánn lí guân-liōng guá Khé-bîng guá buē kuài lí lí m̄-hó siūnn hia--ê tsuè lí hó-hó ióng-pīnn Ka-huī Bín-lâm guá ū tsi̍t-hāng tāi-tsì beh pài-thok lín Khé-bîng ū sí-mih tāi-tsì tsuè lí kóng ná-ē tio̍h pài-thok guá í-king bô-bāng--ah guá nā sí liáu-āu pài-thok lín ang-bóo thuè guá tsiàu-kòo gún lāu-su ê tsa-bóo-kiánn Muê-tsír hó--m̄ Khé-bîng Muê-tsír ê tāi-tsì tsuè lí hòng-sim guá ē tòng-tsoh tshin sió-bē lâi kā-i thiànn-sioh Muê-tsír Khé-bîng hiann guá í-king tsiong lí kau-tài hōo Ka-huī--looh í-āu in ang-bóo ē thuè guá tsiàu-kòo lí lí tio̍h-ài kuai-kuai thiann lâng ê uē--honnh guá tsai-iánn--lah Khé-bîng hiann Tshik-tsiáu--ê ueh! Khé-bîng tuā--ê lí sī guá sí-tiong ê hó-pîng-iú tsāi guá beh lîm-sí ê tsìn-tsîng beh kā lí khóo-khǹg tsi̍t-kù uē lí ài jīn-tsin phah-piànn khuànn ē-tàng tsá tsi̍t-ji̍t lâi sîng-ka li̍p-gia̍p--bô ngh! guá tsai-iánn--lah Khé-bîng tuā--ê--ah lí m̄-hó oo-pe̍h siūnn--lah lí ê pīnn it-tīng ē hó--khí-lâi ê--lah bô-bāng--looh Ka-huī tsit-sì-lâng lán bô-huat-tōo thang kiat-sîng uan-iunn tān-guān āu-sì-lâng ū-iân lán tsiah-koh lâi tsuè-tui tsuè-āu guá beh tsiok lín ang-bóo íng-i̍k ài-hô un-un-ài-ài pi̍k-thiô kai-nóo guá beh kah lín ta̍k-ke íng pa̍t--looh Khé-bîng! Khé-bîng! Khé-bîng hiann Khé-bîng tuā--ê ah Khé-bîng tuā--ê--ooh Khé-bîng! Khé-bîng! Khé-bîng hiann Khé-bîng tuā--ê