16300/《新的金色夜叉》Sin ê Kim-sik Iā-tshe 郭大誠Kueh Tāi-sîng 林美照Lîm Bí-tsiàu 李明玉Lí Bîng-gio̍k ------------------------------------------ 【紹介話頭】 愛情笑詼悲喜劇 ài-tsîng tshiò-khue pi-hí-kio̍k 新的金色夜叉 sin ê kim-sik iā-tshe 謝麗燕，陳文棋編作 Tsiā Lê-iàn, Tân Bûn-kî phian-tsok 郭大誠，林美照，李明玉 Kueh Tāi-sîng, Lîm Bí-tsiàu, Lí Bîng-gio̍k 擔任演唱 tam-jīm ián-tshiùnn ＊＊＊＊＊＊＊＊＊＊＊＊＊＊＊＊＊＊ ♪♫♪♩♬♪♩♬♪♩♫♪♫♪♩♬♪♩♬♪♩♫ 雙人做陣欲散步 siang-lâng tsuè-tīn beh sàn-pōo 臺北行到三重埔 Tâi-pak kiânn kàu Sann-tîng-poo 身軀無錢用行路 sin-khu bô tsînn iōng kiânn-lōo 予我想著面齊烏 hōo guá siūnn-tio̍h bīn tsiâu oo 你我熟似有三年 lí guá si̍k-sāi ū sann-nî 今日約束欲相見 kim-ji̍t iok-sok beh sann-kìnn 請你毋通目屎滴 tshiánn lí m̄-thang ba̍k-sái tih 應該坦白來表示 ing-kai thán-pi̍k lâi piáu-sī ♪♫♪♩♬♪♩♬♪♩♫♪♫♪♩♬♪♩♬♪♩♫ 男) 罔育仔 Bóng-io--á 你佇咧哭是毋？ lí tī-leh khàu, sī--m̄? 盈暗應該是 îng-àm ing-kai sī 愛我哭的時陣 ài guá khàu ê sî-tsūn 才著啦！ tsiah tio̍h--lah! 啊～免哭啦！ ah~ bián khàu--lah! 總講咱兩个人 tsóng-kóng lán nn̄g-ê lâng 是灌打馬膠 sī kuàn tá-má-ka 無鉛啦！ bô iân--lah! 女) 阿春仔 A-tshun--á 你這句話 lí tsit kù uē 是啥物意思咧？ sī siánn-mih ì-sù--leh? 男) 欸！曷袂曉講 eh! ia̍h buē-hiáu kóng 是拍鐵干樂愛灌鉛 sī phah thih-kan-lo̍k ài kuàn iân 啊我都真頇顢 ah guá to tsin hân-bān 灌打馬膠 kuàn tá-má-ka 毋才會予你看無夠重 m̄-tsiah ē hōo lí khuànn bô-kàu-tāng 也就是無緣啦！ Iā tsiū-sī bô-iân--lah! 女) 無這號代誌 bô tsit-lō tāi-tsì 請你毋通按呢講 tshiánn lí m̄-thang án-ne kóng 好毋？ hó--m̄? 男) 啊～煞煞去 ah~ suah-suah--khì 你佇咧哭啥物？ lí tī-leh khàu siánn-mih? 你也毋免用彼號目屎 lí iā m̄-bián iōng hit-lō ba̍k-sái 來當做武器 lâi tòng-tsuè bú-khì 女) 阿春仔 A-tshun--á 請你毋通誤會 tshiánn lí m̄-thang gōo-huē 其實我的心情 kî-si̍t guá ê sim-tsîng 猶原是... iu-guân sī ... 男) 猶原是按怎？ iu-guân sī-án-tsuánn? 猶原是欲將我阿春仔 iu-guân sī beh tsiong guá A-tshun-á 共我當做阿西是毋？ kā guá tòng-tsò a-se, sī--m̄? 哼！ hngh! 女) 你講啥物？ lí kóng siánn-mih? 男) 啊～好囉！好囉！ ah~ hó--looh! hó--looh! 我聽真濟囉！ guá thiann tsin tsuē--looh! 嘿！罔育仔 heh! Bóng-io--á 你共我想看覓 lí kā guá siūnn khuànn-māi 我為著你一个 guá uī-tio̍h lí tsi̍t-ê 這三年來 tsit sann-nî lâi 走甲跤無皮手無皮 tsáu kah kha bô phê tshiú bô phê 踏破了一雙美國草鞋 ta̍h phuà liáu tsi̍t-siang Bí-kok tsháu-ê 予你害甲踅獅尾螺 hōo lí hāi kah se̍h sai-bué-lê 對今仔日起 tuì kin-á-ji̍t khí 我煞著愛去注文 guá suah tio̍h-ài khì tsù-bûn 彼號弓蕉皮 hit-lō king-tsio-phê 女) 阿春仔 A-tshun-á 你注文弓蕉皮 lí tsù-bûn king-tsio-phê 是欲創啥物咧？ sī beh tshòng sánn-meh--leh? 男) 欸！欸！ ennh! ennh! 彼敢著閣說明是毋？ he kám to̍h koh suat-bîng, sī--m̄? 罔育仔 Bóng-io--á 你冷靜想看覓 lí líng-tsīng siūnn khuànn-māi 你敢袂記得 lí kám buē-kì-eh 三年前的六月暑天當寒 sann-nî tsîng ê la̍k-gue̍h sú-thinn tng kuânn 咱初次的約會 lán tshoo-tshù ê iok-huē 猶原是佇咧這个淡水河岸 iu-guân sī tī-eh tsit ê Tām-tsuí-hô huānn 當時咱也有 tong-sî lán ā ū 對太空咒重誓 tuì thài-khong tsiù tāng-tsuā 講我無你袂娶 kóng guá bô lí buē tshuā 你無我袂活 lí bô guá buē ua̍h 嗯～咱也有 ngh~ lán iā ū 點著一蜷的蠓仔香 tiám tio̍h tsi̍t-khûn ê báng-á-hiunn 燒著一刀綿仔紙 sio-tio̍h tsi̍t-to mî-á-tsuá 咱兩个人 lán nn̄g-ê lâng 海誓山盟 hái-sè san-bîng 我將你一吻定情 guá tsiong lí it-bún tīng-tsîng 無疑悟你今仔日 bô-gî-ngōo lí kin-á-ji̍t 煞貪虛榮 suah tham hi-îng 半路變絕情 puànn-lōo piàn tsua̍t-tsîng 嗯~我毋才著去注文 ngh~ guá m̄-tsiah to̍h khì tsù-bûn 弓蕉皮啦 king-tsio-phuê--lah 女) 阿春仔 A-tshun--á 我並毋是無情 guá pīng m̄-sī bô-tsîng 男) 你毋是無情 lí m̄-sī bô-tsîng 猶無你彼跤璇石手指 iá-bô lí hit kha suān-tsio̍h tshiú-tsí 是對佗位來的，唅？ sī tuì tó-uī lâi--ê, hannh? 女) 這跤... tsit kha ... 男) 好！這跤 hó! tsit kha 猶閣有啥物話通辯解？ iá-koh ū siánn-mih uē thang piān-kái? 欸！小等一下，嘿嘿 ennh! sió tán--tsi̍t-ē, hennh hennh 你愛璇石手指是毋？ lí ài suān-tsio̍h tshiú-tsí, sī--m̄? 有影 ū-iánn 我遮嘛有一跤 guá tsia mā ū tsi̍t-kha 你看覓 lí khuànn-māi 女) 啊！你也有一跤！ ah! lí iā ū tsi̍t-kha! 男) 嗯！ ngh! 女) 啊！啊若按呢 ah! ah-nā án-ne 阮媽媽一定會 gún má-mah it-tīng ē 答應咱兩个的婚事 tah-ìng lán nn̄g-ê ê hun-sū 男) 啊！哈哈哈哈哈 ah! hah hah hah hah hah 可惜 khó-sioh 我這跤是昨暗 guá tsit kha sī tsa-àm 佇咧尪仔物店 tī-leh ang-á-mi̍h tiàm 兩箍半所買的 nn̄g-khoo-puànn sóo bé--ê 這跤是𨑨迌物 tsit kha sī thit-thô-mi̍h 這跤完全 tsit kha uân-tsuân 佮你的身軀仝款的啦！ kah lí ê sin-khu kāng-khuán--ê lah! 嗯，你也是變成 ngh, lí iā-sī piàn-sîng 守財奴的𨑨迌物囉 siú-tsâi-lôo ê thit-thô-mi̍h--looh 啊！哈哈哈哈哈 ah! hah hah hah hah hah 女) 阿春仔 A-tshun--á 你 lí 你真無理智 lí tsin bô lí-tì 男) 無理智？ bô lí-tì? 欸～我若會無理智... ennh~ guá nā ē bô lí-tì ... ♪♫♪♩♬♪♩♬♪♩♫♪♫♪♩♬♪♩♬♪♩♫ 怎樣你毋等我一兩年 tsuánn-iūnn lí m̄ tán guá tsi̍t-nn̄g nî 為著我落第誤佳期 uī-tio̍h guá lo̍k-tē ngōo ka-kî 璇石手指來迷了著你 suān-tsio̍h tshiú-tsí lâi bê liáu tio̍h lí 你甘願做人的𨑨迌物 lí kam-guān tsuè lâng ê thit-thô-mi̍h ♪♫♪♩♬♪♩♬♪♩♫♪♫♪♩♬♪♩♬♪♩♫ 女) 阿春仔 A-tshun--á 請你來聽我的辯解 tshiánn lí lâi thiann guá ê piān-kái 好毋？ hó--m̄? 因為這 in-uī tse 並毋是出在我的本意 pīng m̄-sī tshut tsāi guá ê pún-ì 完全是我的爸母 uân-tsuân sī guá ê pē-bú 怹主意的 in tsú-ì--ê 男) 當初你敢毋是 tong-tshoo lí kám m̄-sī 講欲等我三重埔大學 kóng beh tán guá Suann-tîng-poo tāi-ha̍k 畢業了後 pit-gia̍p liáu-āu 才欲佮我結婚 tsiah beh kah guá kiat-hun 無疑悟 bô-gî-ngōo 只為著我 tsí uī-tio̍h guá 干焦落第爾爾 kan-na lo̍k-tē nā-niā 加讀一年爾爾 ke tha̍k tsi̍t-nî nā-niā 你就變心 lí tsiū piàn-sim 女) 彼毋是我的變心 he m̄-sī guá ê piàn-sim 其實是我的爸母的偏心 kî-si̍t sī guá ê pē-bú ê phian-sim 予我真傷心 hōo guá tsin siong-sim 男) 啊～我毋管恁 ah~ guá m̄-kuán lín 變心偏心 piàn-sim phian-sim 或者是傷心菜心 hi̍k-tsiá-sī siong-sim tshài-sim 嗯～高麗參海參嘛好 ngh~ ko-lê-sim hái-sim mā hó 總講乎 tsóng-kóng, honnh 你無體貼心 lí bô thé-thiap-sim 變成無良心 piàn-sîng bô-liông-sim 耽誤著我對你 tam-ngōo tio̍h guá tuì lí 一片的盡心 it-phiàn ê tsīn-sim 現在我的這箍心 hiān-tsāi guá ê tsit khoo sim 強強欲蓬心 kiōng-kiōng-beh pōng-sim 好！到遮來 hó! kàu-tsia lâi 我一心全心激心 guá it-sim tsuân-sim kik-sim 欲來去服務中心 beh lâi-khì ho̍k-bū tiong-sim 揣看有點心通食無 tshē khuànn-ū tiám-sim thang tsia̍h--bô 你請！ lí tshiánn! 女) 慢且咧！ bān-tshiánn--leh! 阿春仔 A-tshun--á 你小等咧 lí sió-tán--leh 你予我最後的要求 lí hōo guá tsuè-āu ê iau-kiû 咱閣做陣來去 lán koh tsuè-tīn lâi-khì 好毋？ hó--m̄? 男) 欲去佗位啊？ bueh khì tó-uī--ah? 袂用得啦 buē-īng-eh--lah 我橐袋仔只賰兩箍半 guá lak-tē-á tsí tshun nn̄g-khoo-puànn 食一碗摵仔麵 tsia̍h tsi̍t-uánn tshi̍k-á-mī 拄拄仔好爾爾 tú-tú-á-hó nā-niā 欲哪有法度通好請你？ beh ná-ū huat-tōo thang-hó tshiánn lí? 哼！ hngh! 女) 慢且是咧！ bān-tshiánn-sī--eh! 我遮有錢嘛！ guá tsia ū tsînn--mah! 男) 唅？ hannh? 欸～你有錢 ennh~ lí ū tsînn 哈哈哈哈哈 hah hah hah hah hah 有影 ū-iánn 我煞去予袂記得啦 guá suah khì hōo buē-kì-eh--lah 你是一个 lí sī tsi̍t-ê 有錢人的太太囉 ū-tsînn-lâng ê thài-thài--looh 你有洋樓通蹛囉 lí ū iûnn-lâu thang tuà--looh 有tha-khú-sih ū tha-khú-sih (taxi) 前花園 tsîng hue-hn̂g 後魚池 āu hî-tî 睏bé-tooh khùn bé-tooh (bed) 坐膨椅 tsē phòng-í 看la-jí-ooh khuànn la-jí-ooh (radio) 聽電視 thiann tiān-sī 食牛奶 tsia̍h gû-ni 配刺身 phuè sa-sí-mih (さしみ) 麵包配ui-sú-kih mī-pau phuè ui-sú-kih (whisky) 哪你看我這个摵仔麵的有起？ ná lí khuànn guá tsit ê tshi̍k-á-mī--ê ū-khí? 嗯～我這个掛仙弓秀才的 ngh~ guá tsit ê khuà sian king siù-tsâi--ê 身份是佮你袂合臺啦 sin-hūn sī kah lí buē ha̍h-tâi--lah 女) 阿春仔 A-tshun--á 你小等咧 lí sió-tán--leh 你聽我講 lí thiann guá kóng ♪♫♪♩♬♪♩♬♪♩♫♪♫♪♩♬♪♩♬♪♩♫ 我毋是看輕著你的人 guá m̄-sī khuànn-khin tio̍h lí ê lâng 為著你前途的美夢 uī-tio̍h lí tsiân-tôo ê bí-bāng 遵守著爸母的希望 tsun-siú tio̍h pē-bú ê hi-bāng 也著來忍耐嫁別人 iā tio̍h lâi jím-nāi kè pa̍t-lâng ♪♫♪♩♬♪♩♬♪♩♫♪♫♪♩♬♪♩♬♪♩♫ 男) 哼！講得真好聽 hngh! kóng tit tsin hó-thiann 你為著我的前途 lí uī-tio̍h guá ê tsiân-tôo 才去嫁別人做某 tsiah khì kè pa̍t-lâng tsò bóo 啊我為著你的前途 iah guá uī-tio̍h lí ê tsiân-tôo 我毋著來去擂眠床鼓？ guá m̄-tio̍h lâi-khì luî bîn-tshn̂g kóo? 女) 因為我一半受著爸母的壓迫 in-uī guá tsi̍t-puànn siū-tio̍h pē-bú ê ap-pik 一半是欲顧全你的學業 tsi̍t-puànn sī beh kòo-tsuân lí ê ha̍k-gia̍p 我希望你 guá hi-bāng lí 去美國留學 khì bí-kok liû-ha̍k 順紲娶一个 sīn-suà tshuā tsi̍t-ê 比我更美麗 pí guá kìng bí-lē 更加可愛的小姐 kìng-ka khó-ài ê sió-tsiá 阿春仔 A-tshun--á 請你將我的代誌 tshiánn lí tsiong guá ê tāi-tsì 放予袂記得 pàng hōo buē-kì-eh 男) 喔謼！ ooh-hooh! 我若你的放袂記的咧 guá ná lí ê pàng-buē-kì ê leh 世界上閣揣也無第二个 sè-kài-siōng koh tshē iā bô tē-jī-ê 比你閣較美麗囉 pí lí koh-khah bí-lē--looh 你彼對彎彎的目眉 lí hit tuì uan-uan ê ba̍k-bâi 親像林黛遐爾可愛 tshin-tshiūnn Lîm Tài hiah-nī khó-ài 猶閣有你彼支蔥管鼻 iá-koh ū lí hit ki tshang-kóng phīnn 靈靈靈喔 li̋ng-lîng-lîng--ooh 佮樂蒂真成 kah Lo̍k-tè tsin sîng 雖然顏小玲 sui-jiân Gân Sió-lîng 目睭大蕊閣媠 ba̍k-tsiu tuā-luí koh suí 但是佮你比起來 tān-sī kah lí pí--khí-lâi 猶無你的遐古錐 iáu bô lí ê hiah kóo-tsui 人講張琪可愛又苗條 lâng kóng Zhāng Qí kěài iū miâu-thiâu 毋過無你的妖嬌呢 m̄-koh bô lí ê iau-kiau--neh 鄧麗君是歌聲有人容 Dèng Lìjūn sī kua-siann ū lâng-îng 姚蘇蓉是唱歌有感情 Yáo Sūróng sī tshiùnn-kua ū kám-tsîng 嗯，啊若你乎 ngh, ah-nā lí, honnh 處處攏比怹閣較自然啦 tshù-tshù lóng pí in koh-khah tsū-jiân--lah 所以我若無看著你 sóo-í guá nā bô khuànn-tio̍h lí 強強欲起神經 kiōng-kiōng-beh khí sîn-king 啊～我已經跤穿咧手䘼 ah~ guá í-king kha tshīng eh tshiú-ńg 徛袂穩 khiā bē ún 一直強強欲交懍恂 it-ti̍t kiōng-kiōng-beh ka-lún-sún 女) 阿春仔！阿春仔！ A-tshun--á! A-tshun--á! 無，你是怎樣呢？ bô, lí sī tsuánn-iūnn--neh? 你較有元氣咧 lí khah ū guân-khì--eh 男) 哎喲! aih-ioh! 罔育仔 Bóng-io--á 我實在愛你甲入髓 guá si̍t-tsāi ài lí kah ji̍p tshé 你可比 lí khó-pí 我烏暗中的蠟燭火 guá oo-àm tiong ê la̍h-tsik hé 腹肚枵的烏甜粿 pak-tóo-iau ê oo-tinn-ké 我為你痴情 guá uī lí tshi-tsîng 若無你 nā bô lí 可比失去了光明 khó-pí sit-khì liáu kong-bîng 喔～起畏寒啦 ooh~ khí uì-kuânn--lah 起畏寒啦 khí uì-kuânn--lah 女) 阿春哥 A-tshun-ko 請你提出著勇氣 tshiánn lí the̍h tshut tio̍h ióng-khì 將我的代誌 tsiong guá ê tāi-tsì 共伊放予袂記得 kā-i pàng hōo buē-kì-eh 你若想講 lí nā siūnn-kóng 欲去美國深造 beh khì Bí-kok tshim-tsō 我希望你 guá hi-bāng lí 行向著光明的大路 kiânn hiòng tio̍h kong-bîng ê tuā-lōo 遮！這兩萬箍 tsia! tse nn̄g-bān khoo 予你去留學做學費 hōo lí khì liû-ha̍k tsuè ha̍k-huì 男) 唅！你用錢 hannh! lí iōng tsînn 欲來共我參詳喔？ beh lâi kā guá tsham-siông--ooh? 看我阿春仔 khuànn guá A-tshun-á 誠實遐爾無路用 tsiânn-si̍t hiah-nī bô-lōo-iōng 我多謝你的誠意 guá to-siā lí ê sîng-ì 我阿春仔 guá A-tshun--á 有我的志氣 ū guá ê tsì-khì ♪♫♪♩♬♪♩♬♪♩♫♪♫♪♩♬♪♩♬♪♩♫ 阿春仔堂堂的男子漢 a-tshun--á tông-tông ê lâm-tsú-hàn 無需要予你來幫忙 bô su-iàu hōo lí lâi pang-bâng 理想的愛人來讓別人 lí-sióng ê ài-jîn lâi niū pa̍t-lâng 換錢來留學欲笑死人 uānn tsînn lâi liû-ha̍k beh tshiò-sí lâng ♪♫♪♩♬♪♩♬♪♩♫♪♫♪♩♬♪♩♬♪♩♫ 男) 我也是一个 guá iā-sī tsi̍t-ê 堂堂五尺以上的男子漢 tông-tông gōo-tshioh í-siōng ê lâm-tsú-hàn 我無需要你來共我幫忙 guá bô su-iàu lí lâi kā guá pang-bâng 我雖然真散赤 guá sui-jiân tsin sàn-tshiah 但是我 tān-sī guá 無論偌濟錢都欲趁 bô-lūn guā-tsē tsînn to beh thàn 看是暗時仔 khuànn sī àm-sî-á 來去收酒矸 lâi-khì siu tsiú-kan 透早賣肉粽 thàu-tsá bē bah-tsàng 寒天賣葵扇 kuânn-thinn bē khuê-sìnn 嗯，啊按呢熱天 ngh, iah án-ne jua̍h-thinn 才來去賣火熥 tsiah lâi-khì bē hé-thang 毛管出汗所趁的錢 mn̂g-kńg tshut-kuānn sóo thàn ê tsînn 才有芳啦 tsiah ū phang--lah 女) 阿春仔 A-tshun--á 請你原諒 tshiánn lí guân-liōng 一切攏是命運啦 it-tshè lóng-sī miā-ūn--lah 男) 啊～免講啦 ah~ bián-kóng--lah 對這馬開始... tuì tsit-má khai-sí ... 【過來，影音曲盤跳針，毋知閬幾句】 ♪♫♪♩♬♪♩♬♪♩♫♪♫♪♩♬♪♩♬♪♩♫ （跳針）明年的今暗暝 (thiàu-tsiam) mê-nî ê kim àm-mî 彼爿的烏雲來表示 hit-pîng ê oo-hûn lâi piáu-sī 用我的目屎來踏著雺霧 iōng guá ê ba̍k-sái lâi ta̍h-tio̍h bông-bū 也就是阮男性的志氣 iā tsiū-sī gún lâm-sìng ê tsì-khì ♪♫♪♩♬♪♩♬♪♩♫♪♫♪♩♬♪♩♬♪♩♫ 男) 罔育仔 Bóng-io--á 希望你會記得 hi-bāng lí ē-kì-eh 明年的今天晚上 mâ-nî ê jīntiān wǎnshàng 或者是 hi̍k-tsiá-sī 三年後的今天晚上 sann-nî āu ê jīntiān wǎnshàng 五年後十年後 gōo-nî āu tsa̍p-nî āu 或者是 hi̍k-tsiá sī 一百年後的今天晚上 tsi̍t-pah nî āu ê jīntiān wǎnshàng 月娘若是罩著雺霧 ge̍h-niû nā-sī tà tio̍h bông-bū 起著大風落著大雨 khí tio̍h tuā-hong lo̍h tio̍h tuā-hōo 彼就是 he tsiū-sī 就是我所流的目屎啦 tsiū-sī guá sóo lâu ê ba̍k-sái--lah （哭） 女) 阿春仔 A-tshun--á 你哪會欲講這款話咧 lí ná ē beh kóng tsit khuán uē--leh 男) 我會講這款話 guá ē kóng tsit khuán uē 也就是你予我 iā tsiū-sī lí hōo guá 烏天暗地的緣故啦 oo-thinn-àm-tē ê iân-kòo--lah ♪♫♪♩♬♪♩♬♪♩♫♪♫♪♩♬♪♩♬♪♩♫ 璇石手指來買了著你 suān-tsio̍h tshiú-tsí lâi bé liáu tio̍h lí 你甘願嫁予人做細姨 lí kam-guān kè hōo-lâng tsuè sè-î 人情佮義理是佗位去 jîn-tsîng kah gī-lí sī tó-uī khì XX來XX是毋值錢 XX lâi XX sī m̄ ta̍t-tsînn ♪♫♪♩♬♪♩♬♪♩♫♪♫♪♩♬♪♩♬♪♩♫ 好！你共我看 hó! lí kā guá khuànn 我對今仔日起 guá tuì kin-á-ji̍t khí 對今仔日起 tuì kin-á-ji̍t khí 欲全心 beh tsuân-sim 來研究尪仔標啦 lâi gián-kiù ang-á-phiau--lah 因為我今仔日的失戀 in-uī guá kin-á-ji̍t ê sit-luân 也就是無錢的所致 iā tiō-sī bô-tsînn ê sóo-tì 所以錢 sóo-í tsînn 你真好用 lí tsin hó-īng 你是我 lí sī guá 精神上的靈魂 tsing-sîn siōng ê lîng-hûn 愛情上的活命 ài-tsîng siōng ê ua̍h miā 錢！錢！ tsînn! tsînn! 欸～我愛你 eh~ guá ài lí 欸～我愛你 eh~ guá ài lí 欸～錢啦！ eh~ tsînn--lah! 欸～錢啦！ eh~ tsînn--lah! 女) 阿春仔 A-tshun--á 你毋通 lí m̄-thang 聲聲句句就是錢 siann-siann-kù-kù tō-sī tsînn 錢雖然是萬能 tsînn sui-jiân sī bān-lîng 猶毋過對我是萬惡 iáu-m̄-koh tuì guá sī bān-ok 男) 啊～閃啦！ ah~ siám--lah! 我無愛聽啦 guá bô-ài thiann--lah 原來女性 guân-lâi lú-sìng 是金錢的奴隸 sī kim-tsînn ê lôo-lē 親像我這款散赤囝 tshin-tshiūnn guá tsit khuán sàn-tshiah-kiánn 有情 ū-tsîng 無錢 bô-tsînn 哪有啥物路用啦！ ná ū siánn-mih lōo-īng--lah! 我看破啦！ guá khuànn-phuà--lah! 女) 請等咧 tshiánn tán--leh 你最後 lí tsuè-āu 閣聽我講一句話好毋 koh thiann guá kóng tsi̍t-kù uē hó--m̄ 男) 啥物？ sí-mih? 你這款女性 lí tsit khuán lú-sìng 敢猶閣有啥物話通講啦！ kám iáu-koh ū siánn-mih uē thang kóng--lah! 啊～閃啦！ ah~ siám--lah! 女) 慢且咧！ bān-tshiánn--leh! 你聽我講 lí thiann guá kóng 其實我是不得已的 kî-si̍t guá sī put-tik-í--ê 你聽我講 lí thiann guá kóng ♪♫♪♩♬♪♩♬♪♩♫♪♫♪♩♬♪♩♬♪♩♫ 請你著等我 tshiánn lí tio̍h tán guá 聽我來說明 thiann guá lâi suat-bîng 這是運命 tse sī ūn-miā 請原諒唷 tshiánn guân-liōng--iooh 為金錢 uī kim-tsînn 看破了一切 khuànn-phuà liáu it-tshè 你咱的幸福 lí lán ê hīng-hok 才著來犧牲 tsiah tio̍h lâi hi-sing ♪♫♪♩♬♪♩♬♪♩♫♪♫♪♩♬♪♩♬♪♩♫ 女) 請等咧 tshiánn tán--leh 你聽我講 lí thiann guá kóng 你毋通怨恨我 lí m̄-thang uàn-hūn guá 世間女性的真情 sè-kan lú-sìng ê tsin-tsîng 往往受著金錢的束縛 óng-óng siū-tio̍h kim-tsînn ê sok-pa̍k 親像我這款 tshin-tshiūnn guá tsit khuán 薄命的女性 po̍k-miā ê lú-sìng 啥物人會當了解咧？ siánn-mih lâng ē-tàng liáu-kái--leh? ♪♫♪♩♬♪♩♬♪♩♫♪♫♪♩♬♪♩♬♪♩♫ 請你著等我 tshiánn lí tio̍h tán guá 可憐的歹命女 khó-lîn ê pháinn-miā-lú 爸母散赤 pē-bú sàn-tshiah 請原諒唷 tshiánn guân-liōng--iooh 對今日 uì kim-ji̍t 看破了一切 khuànn-phuà liáu it-tshè 你咱的情愛 lí lán ê tsîng-ài 才著來犧牲 tsiah tio̍h lâi hi-sing ♪♫♪♩♬♪♩♬♪♩♫♪♫♪♩♬♪♩♬♪♩♫ 男) 哼！照理講 hngh! tsiàu lí kóng 這就是天秤上的愛情啦 tse tsiū-sī thian-phîng siōng ê ài-tsîng--lah 情！情！ tsîng! tsîng! 情就是錢嘛！ tsîng tsiū-sī tsînn mā! 哈哈哈哈哈 hah hah hah hah hah 女) 小等咧！ sió-tán--leh! 你好好聽我講 lí hó-hó thiann guá kóng 男) 免講啦！ bián-kóng--lah! 你請！ lí tshiánn! 女) 慢且咧！ bān-tshiánn--leh! 慢且咧！ bān-tshiánn--leh! ♪♫♪♩♬♪♩♬♪♩♫♪♫♪♩♬♪♩♬♪♩♫ 請你著等我 tshiánn lí tio̍h tán guá 毋通做你行 m̄-thang tsuè lí kiânn 可憐女性 khó-lîn lú-sìng 請原諒唷 tshiánn guân-liōng--iooh 對今日 uì kim-ji̍t 我也心痛苦欸 guá iā sim thòng-khóo--eh 你咱的戀夢 lí lán ê luân-bāng 才著來犧牲 tsiah tio̍h lâi hi-sing ♪♫♪♩♬♪♩♬♪♩♫♪♫♪♩♬♪♩♬♪♩♫ TTTTTTTTTTTTTTTTTTTTTTTTTTTT 【三年後】【三年後】【三年後】 TTTTTTTTTTTTTTTTTTTTTTTTTTTT 女) ♪♫♪♩♬♪♩♬♪♩♫♪♫♪♩♬♪♩♬♪♩♫ 暗淡的月娘照著港邊 àm-tām ê gue̍h-niû tsiò tio̍h káng-pinn 予阮目屎點點滴 hōo gún ba̍k-sái tiám-tiám tih 變樣的富山做伊去 piàn-iūnn ê Hù-san tsuè-i khì 放阮孤單心傷悲 pàng gún koo-tuann sim siong-pi ♪♫♪♩♬♪♩♬♪♩♫♪♫♪♩♬♪♩♬♪♩♫ 男) 欸！你敢毋是罔育仔？ eh! lí kám m̄-sī Bóng-io--á? 欸～毋是 eh~ m̄-sī 你是富山太太 lí sī Hù-san thài-thài 想袂到 siūnn bē-kàu 三年後的今仔日 sann-nî āu ê kin-á-ji̍t 又閣相逢在這个所在 iū-koh siong-hông tsāi tsit ê sóo-tsāi 喔！看起來 ooh! khuànn--khí-lâi 你敢若有較瘦乎？ lí kánn-ná ū khah sán, honnh? 女) 嗯...是呢 ngh... sī--neh 阿春仔兄 A-tshun--á hiann 你是毋是 lí sī-m̄-sī 對美國留學轉來？ tuì Bí-kok liû-ha̍k tńg--âi? 男) 才干焦留學 tsiah kan-na liû-ha̍k 嘛去共人清水溝 mā khì kā-lâng tshing tsuí-kau 拖糞埽 thua pùn-sò 擦皮鞋 tshat phuê-ê 透早去共人賣油炸粿 thàu-tsá khì kā-lâng bē iû-tsia̍h-ké 中晝賣彼號鹹炒粞 tiong-tàu bē hit-lō kiâm-tshá-tshè 暗時仔杏仁茶 àm-sî--á hēng-jîn-tê 有生理做甲無生理 ū sing-lí tsò kah bô sing-lí 尾仔去共人做苦力 bé--á khì kā-lâng tsò ku-lí 無論是 bô-lūn sī 鼠牛虎兔馬羊猴 tshí gû hóo thòo bé iûnn kâu 我逐項都是變透透 guá ta̍k-hāng to-sī pìnn thàu-thàu 總是皇天不負苦心人 tsóng--sī hông-thian put-hū khóo-sim-jîn 佳哉予我 ka-tsài hōo guá 連中十擺的五十萬 liân tiòng tsa̍p-pái ê gōo-tsa̍p-bān 我這馬 guá tsit-má 毋才小可仔會成人 m̄-tsiah sió-khuá-á ē tsiânn-lâng 女) 啊～阿春仔兄 ah~ A-tshun--á hiann 你已經成功得志矣 lí í-king sîng-kong tit-tsì--ah 是毋？ sī--m̄? 我真歡喜 guá tsin huann-hí 你敢知影 lí kám tsai-iánn 彼个無情的富山 hit ê bô-tsîng ê Hù-san 將阮放捒的代誌？ tsiong gún pàng-sak ê tāi-tsì? 男) 嗯，知影 ngh, tsai-iánn 所以我真同情你 sóo-í guá tsin tông-tsîng lí 你敢無看著 lí kám bô khuànn--tio̍h 報紙上的揣人啟事 pò-tsuá siōng ê tshuē-lâng khé-sū 佮電火柱的告示？ kah tiān-hué-thiāu ê kò-sī? 女) 無啊 bô--ah 是啥物代誌 sī siánn-mih tāi-tsì 男) 欸！啊因為我 eh! ah in-uī guá 這馬是好額人 tsit-má sī hó-gia̍h-lâng 想欲共你鬥幫忙 siūnn-beh kā lí tàu-pang-bâng 所以我心堅意決 sóo-í guá sim kian ì kuat 將阮房間仔底出發 tsiong gún pâng-king-á-té tshut-huat 目標寶斗里 bo̍k-phiau Pó-táu-lí 紲落 suà--lo̍h 艋舺公園番薯市 báng-kah kong-hn̂g han-tsî-tshī 江山樓圓環邊 Kang-san-lâu înn-khuân pinn 臺南新町 Tâi-lâm Sin-ting 士林賊仔墘 Sū-lîm Tsha̍t-á-kînn 高雄市政府愛河邊 Ko-hiông Tshī-tsìng-hú Ài-hô pinn 總是為著欲揣你啦 tsóng--sī uī-tio̍h beh tshē lí--lah 女) 唅！ hannh! 男) 又閣走去法院 iū-koh tsáu-khì huat-īnn 養老院孤兒院美容院 ióng-ló-īnn koo-jî-īnn bí-iông-īnn 以及臺北病院 í-ki̍p Tâi-pak pīnn-īnn 上紲尾仔 siōng suà-bué--á 走去松山痟病院 tsáu-khì Siông-san siáu-pīnn-īnn 猶原是揣無你 iu-guân sī tshē-bô lí 姑不將 koo-put-tsiong 才走去探聽區公所 tsiah tsáu-khì thàm-thiann khu-kong-sóo 派出所衛生所 phài-tshut-sóo uē-sing sóo 以及公共廁所 í-ki̍p kong-kiōng tshè-sóo 猶原是無法度 iu-guân sī bô-huat-tōo 最後 tsuè-āu 我無惜路途的遙遠 guá bô-sioh lōo-tôo ê iâu-uán 走去體育館博物館 tsáu-khì thé-io̍k-kuán phok-bu̍t-kuán 當時也揣遍了 tong-sî iā tshē-phiàn liáu 中南北部的殯儀館 tiong, lâm, pak-pōo ê pin-gî-kuán 總講一句 tsóng-kóng tsi̍t-kù 我是為著欲揣你 guá sī uī-tio̍h beh tshē lí 揣甲強強欲半小死 tshē kah kiōng-kiōng-beh puànn-sió-sí 女) （哭） 男) 嗯～罔育仔 ngh~ Bóng-io--á 你又閣佇咧哭矣 lí iū-koh tī-eh khàu--ah 是毋？ sī--m̄? 自從我 tsū-tsiông guá 佮你離開了後 kah lí lī-khui liáu-āu 我捾著一矸太白酒 guá kuānn tio̍h tsi̍t-kan thài-pe̍h-tsiú 想欲來解決著 siūnn-beh lâi kái-kuat tio̍h 我滿腹的憂愁 guá muá-pak ê iu-tshiû 彼當時的我 hit-tong-sî ê guá 嗚呼，是哭甲怎樣 oo-hoo, sī khàu kah tsuánn-iūnn 你敢會了解？ lí kám ē liáu-kái? 我心一下凝 guá sim tsi̍t-ē gîng 喉一下滇 âu tsi̍t-ē tīnn 哭甲親像雷公佇咧霆 khàu kah tshin-tshiūnn luî-kong tī-leh tân 彼矸太白酒 hit kan thài-pe̍h-tsiú 煞啉袂落去啦 suah lim buē lo̍h-khì--lah 只有失戀的目屎 tsí-ū sit-luân ê ba̍k-sái 流到喙角 lâu kah tshuì-kak 我才用喙舌尾 guá tsiah iōng tshuì-tsi̍h-bué 共舐看覓咧 kā tsīnn khuànn-māi--eh 哎喲！彼啥物滋味 aih-iooh! he siánn-mih tsu-bī 你敢會知？ lí kám ē tsai? 女) 目屎鹹鹹 ba̍k-sái kiâm-kiâm 大概X會X去，乎？ 男) 唅！無你哪會知，唅？ hannh! bô, lí ná ē tsai--hannh? 女) 因為我也是佮你仝款 in-uī guá iā-sī kah lí kāng-khuán 同病相憐 tông-pīnn siong-lîn 阿春仔 A-tshun--á 這完全攏是運命啦 tse uân-tsuân lóng-sī ūn-miā--lah 男) 運命？ ūn-miā? 啥物叫做運命？ siánn-mih kiò-tsò ūn-miā? 你的運命 lí ê ūn-miā 是受金錢所支配的啦 sī siū kim-tsînn sóo tsi-phuè ê--lah 女) 這... tse ... 男) 著！ tio̍h! 你當時提兩萬箍 lí tong-sî the̍h nn̄g-bān khoo 欲來贊助我 beh lâi tsàn-tsōo guá 雖然我無收 sui-jiân guá bô siu 但是我知影 tān-sī guá tsai-iánn 你是可憐我 lí sī khó-liân guá 同情我是 tông-tsîng guá sī 一个苦學的人 tsi̍t-ê khóo-ha̍k ê lâng 因為這點 in-uī tsit tiám 我今仔日 guá kin-á-ji̍t 欲來幫忙你 beh lâi pang-bâng lí 遮！遮有五萬箍 tsia! tsia ū gōo-bān khoo 你提去嘛 lí the̍h--khì mah 女) 阿春仔兄 A-tshun--á hiann 雖然現在我是 sui-jiân hiān-tsāi guá sī 一个孤苦無依的人 tsi̍t-ê koo-khóo bû-i ê lâng 但是我毋是愛你的錢 tān-sī guá m̄-sī ài lí ê tsînn 請你了解我 tshiánn lí liáu-kái guá 男) 欸～我真了解 eh~ guá tsin liáu-kái 而且真明白啦 jî-tshiánn tsin bîng-pi̍k--lah 今仔日 kin-á-ji̍t 咱兩个人的感情 lán nn̄g-ê lâng ê kám-tsîng 好親像你彼領 hó-tshin-tshiūnn lí hit niá 紅色的洋裝啦 âng-sik ê iûnn-tsong--lah 已經退了色囉 í-king thè liáu sik--looh 而且變形囉 jî-tshiánn piàn-hîng--looh 若欲愛會完全 nā beh ài ē uân-tsuân 我想你敢若著 guá siūnn lí kánn tio̍h 親像楊令婆褪殼 tshin-tshiūnn Iûnn-līng-pô thǹg-khak 閣再換別領啦 koh-tsài uānn pa̍t niá--lah 女) 啥... siánn... 阿春仔兄 A-tshun--á hiann 本來我是有 pún-lâi guá sī ū 真濟衫通換 tsin tsē sann thang uānn 但是都攏當了了囉 tān-sī to-lóng tǹg liáu-liáu--looh 男) 欸！當了了喔 ennh! tǹg liáu-liáu--ooh 彼哪有啥物關係啦 he ná-ū siánn-mih kuan-hē--lah 閣做新的嘛 koh tsò sin--ê mah 人講 lâng kóng 有錢使鬼會挨磨 ū-tsînn sái kuí ē e-bō 嗒！遮的錢 tah! tsia-ê tsînn 你提去買豬頭皮來戴啦 lí the̍h-khì bé ti-thâu-phuê lâi tì--lah ♪♫♪♩♬♪♩♬♪♩♫♪♫♪♩♬♪♩♬♪♩♫ 罔育仔 Bóng-io--á 我明白我明白 guá bîng-pi̍k guá bîng-pi̍k 罔育仔罔育仔 Bóng-io--á Bóng-io--á 我了解我了解 guá liáu-kái guá liáu-kái 罔育仔 Bóng-io--á 你彼號花言巧語 lí hit-lō hua-giân khá-gú 已經聽真濟 í-king thiann tsin tsuē 永遠咧 íng-uán teh 永遠咧恨你 íng-uán teh hūn lí 為怎樣你會來放我 uī tsuánn-iūnn lí ē lâi pàng guá 你將我 lí tsiong guá 當做一个阿西 tòng-tsò tsi̍t-ê a-se 罔育仔 Bóng-io--á 你著愛覺悟啦 lí tio̍h-ài kak-ngōo--lah 罔育仔罔育仔 Bóng-io--á Bóng-io--á 你真是不應該 lí tsin sī put-ing-kai 罔育仔 Bóng-io--á 欺騙我的感情 khi-phiàn guá ê kám-tsîng 我恨你我恨你我恨你 guá hūn lí guá hūn lí guá hūn lí 我永遠怨恨你 guá íng-uán uàn-hūn lí 罔育仔 Bóng-io--á 你著愛覺悟啦 lí tio̍h-ài kak-ngōo--lah 罔育仔罔育仔 Bóng-io--á Bóng-io--á 你真是不應該 lí tsin sī put-ing-kai 罔育仔 Bóng-io--á 欺騙我的感情 khi-phiàn guá ê kám-tsîng 我恨你我恨你我恨你 guá hūn lí guá hūn lí guá hūn lí 我永遠怨恨你 guá íng-uán uàn-hūn lí ♪♫♪♩♬♪♩♬♪♩♫♪♫♪♩♬♪♩♬♪♩♫ 女) 阿春仔兄 A-tshun--á hiann 男) 罔育仔 Bóng-io--á 你較早敢毋是講 lí khah-tsá kám m̄-sī kóng 愛挃璇石手指？ ài-ti̍h suān-tsio̍h tshiú-tsí? 遮，遮的錢 tsia, tsia-ê tsînn 攏是欲予你的嘛 lóng-sī beh hōo lí ê mah 你聽好去買 lí thìng-hó khì bé 三五十跤仔來掛嘛 sann-gōo-tsa̍p kha-á lâi kuà--mah 女) 阿春仔兄 A-tshun--á hiann 你未免太過份囉 lí bī-bián thài kè-hūn--looh （哭） 男) 你現在 lí hiān-tsāi 不應該再傷心啦 put-ing-kai tsài siong-sim--lah 應該歡喜才著 ing-kai huann-hí tsiah tio̍h 現在你的願望 hiān-tsāi lí ê guān-bōng 我已經予你達成矣啦嘛 guá í-king hōo lí ta̍t-sîng--ah lah-mah 女) 阿春仔兄 A-tshun--á hiann 我的願望 guá ê guān-bōng 也就是你的成功 iā tsiū-sī lí ê sîng-kong 男) 你講得真好聽 lí kóng tit tsin hó-thiann 你敢有想著我當時 lí kám ū siūnn-tio̍h guá tong-sî 為你失戀的心情 uī lí sit-luân ê sim-tsîng 是何等樣的痛苦呢？ sī hô-tíng-iūnn ê thòng-khóo--neh? 你敢會知 lí kám ē tsai 有人為著失戀 ū-lâng uī-tio̍h sit-luân 致使去跳海 tì-sú khì thiàu hái 有的去跳大埤 ū-ê khì thiàu tuā-pi 有的去跳鼓井 ū-ê khì thiàu kóo-tsínn 我 guá 我猶原 guá iu-guân 是其中的一个啦 sī kî-tiong ê tsi̍t-ê--lah 女) 有影無！？ ū-iánn--bô! ? 阿春仔兄 A-tshun--á hiann 抑無 ia̍h-bô 你是去跳啥物貨呢？ lí sī khì thiàu siánn-meh-hè--neh? 男) 我喔 guá--ooh 我失戀的初期 guá sit-luân ê tshoo-kî 苦傷悲 khóo siong-pi 淋淚啼 lâm luī thî 想欲去跳大埤 siūnn-beh khì thiàu tuā-pi 共摸一个看覓咧 kā bong tsi̍t-ê khuànn-māi--eh 哎喲！水閣冷吱吱喔 aih-iooh! tsuí koh líng-ki-ki--ooh 我自按呢 guá tsū-án-ne 將欲去天國旅行的路照 tsiong beh khì thian-kok lí-hîng ê lōo-tsiàu 共改延期 kā kái iân-kî 性命暫時來共保持 sìnn-miā tsiām-sî lâi kā pó-tshî 女) 啊！真佳哉 ah! tsin ka-tsài 啊紲落去咧？ ah suà--lo̍h-khì leh? 男) 紲落去喔 suà--lo̍h-khì ooh 我都罔趖罔趖 guá to bóng sô bóng sô 趖到淡水河 sô kàu Tām-tsuí-hô 我目屎輾輾翱 guá ba̍k-sái lìn-lìn kō 一聲欲直接來去見閻羅 tsi̍t-siann beh ti̍t-tsiap lâi-khì kìnn Giâm-lô 欸！慢且是咧 eh! bān-tshiánn-sī--leh 女) 啊無 ah bô 是發生啥物代誌 sī huat-sing siánn-mih tāi-tsì 你哪會無跳落去咧 lí ná ē bô thiàu--lo̍h-khì leh 男) 唅！啊無 hannh! ah bô 你毋著愛我緊去死 lí m̄-tio̍h ài guá kín khì sí 是毋？ sī--m̄? 女) 欸...嗯...，無啦 eh...ngh..., bô--lah 我是看你 guá sī khuànn lí 表演甲遐爾仔逼真 piáu-ián kah hah-nī-á pik-tsin 故事真動人 kòo-sū tsin tōng-jîn 鏡頭也真好 kiànn-thâu iā tsin hó 我是助你的三通鼓 guá sī tsōo lí ê sam-thong kóo 較緊咧較緊咧啦 khah-kín--leh khah-kín--leh lah 男) 較緊怎樣？ khah-kín tsánn-iūnn? 較緊叫我去死 khah-kín kiò guá khì sí 是毋？ sī--m̄? 女) 毋是啦 m̄-sī--lah 這馬演甲當緊張 tsit-má ián kah tng kín-tiunn 毋著做一个較熱場咧 m̄-to̍h tsò tsi̍t-ê khah jia̍t-tiûnn--eh 較緊講啦 khah-kín kóng--lah 男) 乎！乎！好 honnh! honnh! hó 到遮來 kàu-tsia lâi 世間無留戀 sè-kan bô liû-luân 我欲死一个仔 guá beh sí tsi̍t-ê-á 通予萬古流傳 thang hōo bān-kóo liû-thuân 女) 你乎 lí, honnh 真偉大 tsin uí-tāi 你就共伊 lí tō kā-i 死一个仔看覓咧嘛 sí tsi̍t-ê-á khuànn-māi--eh mah 男) 唅！？ hannh! ? 你煞贊成我死 lí suah tsàn-sîng guá sí 是毋？ sī--m̄? 女) 成人之美嘛 sîng-jîn tsi-bí--mah 啊紲落去咧？ ah suà--lo̍h-khì leh? 男) 喔，紲落去喔 ooh, suà--lo̍h-khì ooh 紲落去 suà--lo̍h-khì 都河溝頭 to hô-kau thâu 佇咧放溝仔水 tī-leh pàng kau-á tsuí 臭毛毛垃圾鬼 tshàu-moo-mōo lah-sap-kuí 彼號五種的氣味 hit-lō gōo-tsióng ê khì-bī 鼻落到地 phīnn lo̍h kàu-tè 穩當會破病 ún-tàng ē phuà-pīnn 這聲若跳落去 tsit-siann nā thiàu--lo̍h-khì 激一下 kik tsi̍t-ē 隱袂飼咧 ún buē tshī--eh 這種的毋是麵 tsiőng-ê m̄-sī mī 看破 khuànn-phuà 往回食家己 óng-huê tsia̍h-ka-kī 我想來想去 guá siūnn-lâi-siūnn-khì 無步數 bô pōo-sòo 姑不而將 koo-put-jî-tsiong 才去跳 tsiah khì thiàu 跳彼號... thiàu hit-lō ... 女) 跳海 thiàu hái 是毋？ sī--m̄? 男) 欸！欸！ eh! eh! 毋是啦 m̄-sī--lah 去跳曼波 khì thiàu bàm-booh 女) 唅！ hannh! 男) 跳一下 thiàu--tsi̍t-ē 起毛好 khí-moo hó 啊紲落去 ah suà--lo̍h-khì 煞跳彼號阿哥哥 suah thiàu hit-lō a-ko-ko 女) 嗯...哼！ ngh...hngh! 男子漢 lâm-tsú-hàn 遐爾仔無勇氣 hah-nī-á bô ióng-khì 男) 唅！我為著你 hannh! guá uī-tio̍h lí 險險仔去死 hiám-hiám-á khì sí 你閣笑我講無勇氣 lí koh tshiò guá kóng bô ióng-khì 罔育仔 Bóng-io--á 枉費我 óng-huì guá 這幾若年期待你 tsit kuí-lō nî kî-thāi lí 無路用 bô-lōo-īng 哎喲！我苦囉！ aih-iooh! guá khóo--looh! 我的舊症頭 guá ê kū tsìng-thâu 又閣咧欲發起來囉 iū-koh tih-beh huat--khí-lâi looh 喔喔喔喔 ooh ooh ooh ooh 女) 哎喲！ aih-iooh! 阿春仔兄 A-tshun--á hiann 無，你是怎樣呢？ bô, lí sī tsuánn-iūnn--neh? 男) 又閣咧起畏寒矣 iū-koh leh khí uì-kuânn--ah 女) 你較有元氣啊 lí khah ū guân-khì--ah 啊阿春仔兄 ah A-tshun--á hiann 男) 我濛欸 guá bông--eh 濛～欸～ bông~ eh~ 女) 阿春仔兄 A-tshun--á hiann 醒來喔 tshínn--lâi ooh 男) 啊～面前敢毋是 ah~ bīn-tsîng kám m̄-sī 金色夜叉嘛？ kim-sik iā-tshe--mah? 女) 毋是啦 m̄-sī--lah 我是罔育仔啦 guá sī Bóng-io--á--lah 男) 唅～你是罔育仔喔 hannh~ lí sī Bóng-io--á--ooh 女) 阿春仔兄 A-tshun--á hiann 你較鎮靜咧 lí khah tìn-tsīng--leh 男) 啊～罔育仔 ah~ Bóng-io--á 我拄才接著 guá tú-tsiah tsiap-tio̍h 太白金星的一通電話 Thài-pi̍k-kim-sing ê tsi̍t-thong tiān-uē 佮閻羅王的 kah Giâm-lô-ông ê 一張限時的掛號批 tsi̍t-tiunn hān-sî ê kuà-hō-phe 講起... kóng-khí ... 講起... kóng-khí ... 女) 講起啥物咧？ kóng-khí siánn-meh--leh? 男) 啊都太白金星 ah to Thài-pi̍k-kim-sing 先共我講 sing kā guá kóng 講你佮我的關係 kóng lí kah guá ê kuan-hē 是五百年前註定 sī gōo-pah nî tsîng tsù-tiānn 冤家變親家 uan-ke piàn tshin-ke 這世人著愛做伙 tsit-sì-lâng tio̍h-ài tsò-hé 若無做伙 nā bô tsò-hué 一定愛一个 it-tīng ài tsi̍t-ê 去閻羅王遐出差 khì Giâm-lô-ông hia tshut-tshe 講頭塊交椅欲讓咱坐啦 kóng thâu-tè kau-í beh niū lán tsē--lah 女) 唅！你你是毋是 hannh! lí, lí sī-m̄-sī 佇咧陷眠咧？ tī-eh hām-bîn--leh? 男) 無喔！ bô--ooh! 我曷無佇咧陷眠 guá a̍h bô tī-eh hām-bîn 你應該愛相信 lí ing-kai ài siong-sìn 你佮我可比是 lí kah guá khó-pí sī 金童玉女來化身 kim-tông gio̍k-lí lâi huà-sin 佮七世夫妻有原因 kah tshit-sè hu-tshe ū guân-in 咱應該 lán ing-kai 先苦而後甘 sing khóo jî-hiō kam 這杯戀愛的苦酒 tsit pue luân-ài ê khóo-tsiú 咱註該啉 lán tsù-kai lim 英臺註定三伯的某 Ing-tâi tsù-tiānn Sam-phik ê bóo 無彩馬俊的功勞 bô-tshái Bé-tsùn ê kong-lô 五百年前是註好好 gōo-pah nî tsîng sī tsù-hó-hó 英臺命中配梁哥 Ing-tâi miā-tiong phuè Niû-ko ♪♫♪♩♬♪♩♬♪♩♫♪♫♪♩♬♪♩♬♪♩♫ 英臺註定是三伯的某 Ing-tâi tsù-tiānn sī Sam-phik ê bóo 無彩馬俊的功勞 bô-tshái Bé-tsùn ê kong-lô 五百年前註好好 gōo-pah nî tsîng tsù-hó-hó 英臺命中配梁哥 Ing-tâi miā-tiong phuè Niû-ko ♪♫♪♩♬♪♩♬♪♩♫♪♫♪♩♬♪♩♬♪♩♫ 女) ♪♫♪♩♬♪♩♬♪♩♫♪♫♪♩♬♪♩♬♪♩♫ 馬前潑水難得收 má tsîng phuah tsuí lân-tit siu 毋敢望你來收留 m̄-kánn bāng lí lâi siu-liû 看你功名會成就 khuànn lí kong-bîng ē sîng-tsiū 情願春水向東流 tsîng-guān tshun-tsuí hiòng tang liû ♪♫♪♩♬♪♩♬♪♩♫♪♫♪♩♬♪♩♬♪♩♫ 男) 陳三為娘學磨鏡 Tân-sann uī niû o̍h buâ kiànn 五娘為情綴三兄 Gōo-niû uī tsîng tuè Sann-hiann 你我應該再約定 lí guá ing-kai tsài iok-tiānn 才袂姜女哭長城 tsiah buē Khiunn-lí khàu Tn̂g-siânn ♪♫♪♩♬♪♩♬♪♩♫♪♫♪♩♬♪♩♬♪♩♫ 陳三為娘學磨鏡 Tân-sann uī niû o̍h buâ kiànn 五娘為情綴三兄 Gōo-niû uī tsîng tuè Sann-hiann 你我應該再約定 lí guá ing-kai tsài iok-tiānn 才袂姜女哭長城 tsiah buē Khiunn-lú khàu Tn̂g-siânn ♪♫♪♩♬♪♩♬♪♩♫♪♫♪♩♬♪♩♬♪♩♫ 女) ♪♫♪♩♬♪♩♬♪♩♫♪♫♪♩♬♪♩♬♪♩♫ 我佮你有情佮有義 guá kah lí ū-tsîng kah ū-gī 自問此時歹八字 tsū-būn tshú-sî pháinn peh-gī 經過富山做細姨 king-kuè Hù-san tsuè sè-î 無彼號資格匹配你 bô hit-lō tsu-keh phit-phuè lí ♪♫♪♩♬♪♩♬♪♩♫♪♫♪♩♬♪♩♬♪♩♫ 男) 當時你離開我的時 tong-sî lí lī-khui guá ê sî 確實是我一生中 khak-si̍t sī guá it-sing-tiong 最痛苦的代誌 tsuè thòng-khóo ê tāi-tsì 所以我認為 sóo-í guá jīn-uî 你是一个金色夜叉 lí sī tsi̍t-ê kim-sik iā-tshe 但是最近 tān-sī tsuè-kīn 我所聽著的消息 guá sóo thiann--tio̍h ê siau-sit 才使我 tsiah sú guá 漸漸對你了解 tsiām-tsiām tuì lí liáu-kái 佮暗暗的同情你 kah àm-àm ê tông-tsîng lí 現在咱莫計較 hiān-tsāi lán mài kè-kàu 應該將過去的代誌 ing-kai tsiong kè-khì ê tāi-tsì 放水流 pàng tsuí lâu 破鏡重圓好到老 phuà-kiànn tiông-înn hó kàu-lāu 女) 袂用得 buē-īng-eh 阿春仔 A-tshun--á 我已經 guá í-king 無資格通嫁你矣 bô tsu-keh thang kè lí--ah 恐驚會 khióng-kiann ē 妨害著你的名譽 hông-hāi to̍h lí ê bîng-gū 男) 講啥物？ kóng siánn-mih? 真正的愛情 tsin-tsiànn ê ài-tsîng 是無分階級佮貧賤 sī bô hun kai-kip kah pîn-tsiān 只要咱兩个人 tsí-iàu lán nn̄g-ê lâng 心心相愛 sim sim siong-ài 將過去的一切 tsiong kè-khì ê it-tshè 當做一場的惡夢 tòng-tsò tsi̍t-tiûnn ê ok-bāng 用心建立美滿的家庭 iōng-sim kiàn-li̍p bí-buán ê ka-tîng 敢毋是真好呢？ kám m̄ sī tsin hó--neh? 女) 袂用得 buē-īng-eh 袂用得 buē-īng-eh 男) 唅？ hannh? 閣誠實袂用得 koh tsiânn-si̍t buē-īng-eh 啊！好啦！ ah! hó--lah! 到遮來 kàu-tsia lâi 罔育仔你共我看 Bóng-io--á lí kā guá khuànn 我遮一包一包 guá tsia tsi̍t-pau tsi̍t-pau 這包就是三年前 tsit pau tsiū-sī sann-nî tsîng 我欲準備自殺的毒藥啦 guá beh tsún-pī tsū-sat ê to̍k-io̍h--lah 女) 啥物？！ siánn-meh?! 男) 三年後的今仔日 sann-nî āu ê kin-á-ji̍t 我無食 guá bô tsia̍h 猶原是袂用得啦 iu-guân sī buē-īng-eh--lah 罔育仔你真殘忍 Bóng-io--á lí tsin tsân-jím 我第一次失戀 guá tē-it tshù sit-luân 予你害無死 hōo lí hāi bô sí 第二次我想 tē-jī tshù guá siūnn 無死是袂埋得啦 bô sí sī buē tâi--eh lah 女) 阿春仔 A-tshun--á 你袂用得死的 lí buē-īng-eh sí--ê 男) 我無死 guá bô sí 就袂當 tō buē-tàng 親像七世夫妻矣咧 tshin-tshiūnn tshit-sè hu-tshe--ah-leh 女) 阿春仔 A-tshun--á 你不應該死 lí put-ing-kai sí 應該愛死的人是我 ing-kai ài sí ê lâng sī guá 你彼包毒藥予我 lí hit pau to̍k-io̍h hōo guá 男) 唅！啥物！ hannh! siánn-mih! 你欲死予我看喔？ lí beh-sí hōo guá khuànn--ooh? 女) 嗯！ ngh! 男) 好！藥仔予你 hó! io̍h-á hōo lí 提去！ the̍h--khì! 哼！我才毋相信講 hngh! guá tsiah m̄ siong-sìn kóng 你誠實敢食 lí tsiânn-si̍t kánn tsia̍h 嘿！嘿！嘿！啊！ heh! heh! heh! ah! 啊你誠實吞落去喔！ ah lí tsiânn-si̍t thun--lo̍h-khì ooh! 誠實食落去喔！ tsiânn-si̍t tsia̍h--lo̍h-khì ooh! 女) 阿春仔 A-tshun--á 在我猶未死以前 tsāi guá iá-bē sí í-tsîng 請你聽我 tshiánn lí thiann guá 講幾句仔遺言 kóng kuí-kù-á uî-giân 好毋？ hó--m̄? 這世人我辜負你 tsit-sì-lâng guá koo-hū lí 但是後世人 tān-sī āu-sì-lâng 我絕對欲 guá tsua̍t-tuì beh 還你這筆的感情債 hâinn lí tsit pit ê kám-tsîng-tsè 女) 阿春兄 A-tshun hiann 男) 嗯 ngh 女) 我 guá 我愛你 guá ài lí 男) 唅！ hannh! 女) 我永遠都愛你 guá íng-uán to ài lí 男) 欸，有影抑無？ eh, ū-iánn ia̍h bô? 我嘛真愛你 guá mā tsin ài lí 罔育仔 Bóng-io--á 是講 sī-kóng 你既然有愛我 lí kì-jiân ū ài guá 哪通予我 ná thang hōo guá 等到後出世啦 tán-kah āu-tshut-sì--lah 親像我這款 tshin-tshiūnn guá tsit khuán 遮爾歹運的男性 tsiah-nī pháinn-ūn ê lâm-sìng 毋拄好後出世 m̄-tú-hó āu-tshut-sì 若出世做查某的 nā tshut-sì tsò tsa-bóo--ê 我欲哪有辦法通娶你啦？ guá beh ná-ū pān-huat thang tshuā lí--lah? 所以你 sóo-í lí 猶是現在來答應我 iáu-sī hiān-tsāi lâi tah-ìng guá 做一个仔阿春仔太太 tsuè tsi̍t-ê-á A-tshun-á thài-thài 女) 但是 tān-sī 但是我... tān-sī guá ... 男) 嗯，你按怎？ ngh, lí án-tsuánn? 女) 我藥性若是發 guá io̍h-sìng nā-sī huat 著愛去天國旅行矣 tio̍h-ài khì thian-kok lú-hîng--ah 欲怎樣來答應你？ beh tsuánn-iūnn lâi tah-ìng lí? 男) 彼袂喔！ he buē--ooh! 你藥氣若發乎 lí io̍h-khì nā huat, honnh 你會食咧規百歲 lí ē tsia̍h eh kui-pah huè 你頭拄仔 lí thâ-tú-á 是中著我的計 sī tiòng-tio̍h guá ê kè 彼包毋是毒藥啦 hit pau m̄-sī to̍k-io̍h--lah 女) 唅！ hannh! 男) 彼包是tsioo-kóo-lè-tooh hit pau sī tsioo-kóo-lè-tooh (chocolate) 摻塗豆仁啦！ tsham thôo-tāu-jîn--lah! 食著 tsia̍h-tio̍h 補血兼提神 póo-hiat kiam thê-sîn 增加咱兩个人的感情喔 tsing-ka lán nn̄g-ê lâng ê kám-tsîng--ooh 女) 阿春仔 A-tshun--á 敢誠實有影是毋？ kám tsiânn-si̍t ū-iánn, sī--m̄? 嗯～阮毋知啦～ ngh~ gún m̄-tsai--lah~ 男) 欸～罔育仔 eh~ Bóng-io--á 彼你毋知啦 he lí m̄-tsai--lah 彼毋過我知咧 he m̄-koh guá tsai--leh 女) 嗯～嗯嗯嗯～ ngh~ ngh-ngh-ngh~ 男) 哈哈哈哈哈 hah hah hah hah hah ------------------------------------------ →
愛情笑詼悲喜劇 新的金色夜叉 謝麗燕，陳文棋編作 郭大誠，林美照，李明玉
ài-tsîng tshiò-khue pi-hí-kio̍k sin ê kim-sik iā-tshe Tsiā Lê-iàn, Tân Bûn-kî phian-tsok Kueh Tāi-sîng, Lîm Bí-tsiàu, Lí Bîng-gio̍k