《糊塗總舖師》Hôo-tôo Tsóng-phòo-sai郭大誠 Kueh Tāi-sîng------------------------------------------人人叫我是總舖師 / lâng-lâng kiò guá sī tsóng-phòo-sai上蓋出名是𠢕煮菜 / siōng-kài tshut-miâ sī gâu tsú-tshài料理好食是蓋全臺 / liāu-lí hó-tsia̍h sī kài tsuân-Tâi名聲轟動是全世界 / miâ-siann hong-tōng sī tsuân-sè-kài↓↓(口白)---(口白)---(口白)↓↓來來來 / lâi, lâi, lâi手攑菜刀 / tshiú gia̍h tshài-to對遮來 / tuì tsia lâi是因為彼个躼跤才 / sī in-uī hit-ê Lò-kha-Tsâi𪜶囝娶太太 / in kiánn tshuā thài-thài才叫我這个 / tsiah kiò guá tsit-ê糊塗的總舖師 / hôo-tôo ê tsóng-phòo-sai欲來辦酒菜 / beh lâi pān tsiú-tshài兇狂行入灶跤內 / hiong-kông kiânn-ji̍p tsàu-kha lāi酸醋提來試看覓 / sng-tshòo the̍h-lâi tshì-khuànn-māi氣味閣袂䆀 / khì-bī koh buē-bái莫怪查某人 / bo̍k-kuài tsa-bóo-lâng食醋的時陣 / tsia̍h-tshòo ê sî-tsūn才會遐可愛 / tsiah-ē hiah khó-ài我的料理 / guá ê liāu-lí是奇奇佮怪怪 / sī kî-kî kah kuài-kuài有食過的人攏會知 / ū tsia̍h--kuè ê lâng lóng ē tsai啊若無食過的人 / ah-nā bô tsia̍h--kuè ê lâng請恁試看覓 / tshiánn lín tshì-khuànn-māi代先鴨卵來敲破 / tāi-sing ah-nn̄g lâi khà-phuà欲煎鴨卵摻麵線 / beh tsian ah-nn̄g tsham mī-suànn鴨卵落鼎是嗶噗彈 / ah-nn̄g lo̍h-tiánn sī pi̍t-phok tuānn白仁走四散 / pe̍h-jîn tsáu sì-suànn紅仁才探頭出來看 / âng-jîn tsiah tham-thâu tshut-lâi khuànn看看看 / khuànn, khuànn, khuànn這齣是腰子炒豬肝 / tsit tshut sī io-tsí tshá ti-kuann豬肝著愛炒予爛爛 / ti-kuann tio̍h-ài tshá hōo nuā-nuā才袂損害著 / tsiah buē sún-hāi tio̍h阿婆的喙齒岸 / a-pô ê tshuì-khí-huānn紲落去這齣 / suà--lo̍h-khì tsit tshut就是紅燒魚五柳枝 / tiō-sī âng-sio-hî ngóo-liú-ki酸醋加四兩二 / sng-tshòo ka sì-niú-jī才會當治療病相思 / tsiah ē-tàng tī-liâu pīnn-siunn-si閣來這齣 / koh lâi tsit tshut龍蝦炒韭菜 / lîng-hê tshá kú-tshài凡是無夠力的翁婿 / huân-sī bô-kàu-la̍t ê ang-sài食了後 / tsia̍h liáu-āu才毋免閣再驚太太 / tsiah m̄-bián koh-tsài kiann thài-thài來喔~ / lâi--ooh~今仔日最重要的 / kin-á-ji̍t tsuè tiōng-iàu--ê就是這齣 / tsiū-sī tsit tshut美國來的火雞 / bí-kok lâi ê hué-ke這隻火雞 / tsit tsiah hué-ke毛生做特別豔麗 / moo senn tsò ti̍k-pia̍t iām-lê我想講 / guá siūnn-kóng欲共挽幾枝仔起來 / beh kā bán kuí ki-á--khí-lâi送阮彼个 / sàng gún hit-ê猶毋過 / iáu-m̄-koh這隻火雞 / tsit tsiah hué-ke誠歹性地 / tsiânn pháinn-sìng-tē我毛共掣一枝 / guá moo kā tshuah tsi̍t-ki伊共我啄一个 / i kā guá tok tsi̍t-ê掣兩枝 / tshuah nn̄g-ki共我啄兩个 / kā guá tok nn̄g-ê我人去共伊修面剃喙䫌 / guá lâng khì kā-i siu-bīn thì tshuì-phé啊這隻美國火雞 / ah tsit tsiah Bí-kok hué-ke實在有影袂曉衰 / si̍t-tsāi ū-iánn bē-hiáu sue毛都掣了了囉 / moo to tshuah liáu-liáu--loh也敢逃亡到大街 / iā kánn tô-bông kàu tuā-ke害我逐甲喘怦怦 / hāi guá jik kah tshuán-phēnn-phēnn我沿路逐 / guá iân-lōo jik伊按呢沿路走 / i án-ne iân-lōo tsáu沿路飛 / iân-lōo pue可比世界的運動會 / khó-pí sè-kài ê ūn-tōng-huē講起來實在真笑詼 / kóng--khí-lâi si̍t-tsāi tsin tshiò-khue這隻火雞 / tsit tsiah hué-ke煞跋落去臭溝仔底 / suah pua̍h lo̍h-khì tshàu-kau-á té我趕緊利用這个機會 / guá kuánn-kín lī-iōng tsit-ê ki-huē共掠轉來 / kā lia̍h tńg-lâi用洗衣機一直洗 / iōng sé-i-ki it-ti̍t sé奇怪啊 / kî-kuài--ah洗半點外鐘久 / sé puàn-tiám-guā tsing kú氣味仙洗都洗袂退 / khì-bī sian sé to sé bē thè人客客廳坐 / lâng-kheh kheh-thiann tsē等甲強強欲發性地 / tán kah kiōng-kiōng-beh huat-sìng-tē叫我趕緊出火雞 / kiò guá kuánn-kín tshut hué-ke我就按呢乾乾脆脆 / guá tsiū-án-ne kan-kan-tshè-tshè三十六刀 / sann-tsa̍p-la̍k to七十二塊 / tshit-tsa̍p-jī tè快速使炎火 / khuài-sok sái iām-hué做好 / tsò hó才共捀出去請人客 / tsiah kā phâng tshut-khì tshiánn-lâng-kheh彼人客看著是美國火雞 / he lâng-kheh khuànn-tio̍h sī Bí-kok hué-ke按呢逐家相爭夾 / án-ne ta̍k-ke sio-tsinn ngeh窒窒咧規喙䫌 / that-that--leh kui tshuì-phé窒了後 / that liáu-āu才知影氣味有問題 / tsiah tsai-iánn khì-bī ū būn-tê想講欲吐出來 / siūnn-kóng beh thòo--tshut-lâi又閣驚歹勢啊 / iū-koh kiann pháinn-sè--ah只好目睭激瞌瞌 / tsí-hó ba̍k-tsiu kik kheh-kheh大个共伊吞落去腹肚底 / tuā-ê kā-i thun lo̍h-khì pak-tóo-té順紲呵咾 / sūn-suà o-ló我這个總舖師的好手藝 / guá tsit-ê tsóng-phòo-sai ê hó tshiú-gē也會曉煮這號美國來的火雞 / iā ē-hiáu tsú tsit-lō Bí-kok lâi ê hué-ke↑↑(口白)---(口白)---(口白)↑↑人人叫我是總舖師 / lâng-lâng kiò guá sī tsóng-phòo-sai上蓋出名是𠢕煮菜 / siōng-kài tshut-miâ sī gâu tsú-tshài料理好食是蓋全臺 / liāu-lí hó-tsia̍h sī kài tsuân-Tâi名聲轟動是全世界 / miâ-siann hong-tōng sī tsuân-sè-kài先生食著笑咍咍 / sian-sinn tsia̍h tio̍h tshiò-hai-hai小姐食著好體材 / sió-tsiá tsia̍h tio̍h hó thé-tsâi囡仔食著真可愛 / gín-á tsia̍h tio̍h tsin khó-ài毋信請恁試看覓 / m̄ sìn, tshiánn lín tshì-khuànn-māi------------------------------------------→
（無）
（無）